УИХ-ын гишүүн Д.Цогтбаатар өөрийн нүүр хуудастаа “За, вакцин Монголд үнэгүй орж ирэх нь. Ерөнхий сайд, Сангийн яамны ажлын хэсэг зорьсондоо хүрчээ” хэмээн жиргэсэн.

Тэгвэл энэ нь Энэтхэг улсын Засгийн газар дотооддоо үйлдвэрлэсэн коронавирусний халдварын эсрэг Covaxin, Covishield вакциныг хөрш болон найрсаг харилцаатай түнш улсдаа хандивлахаар болж, эдгээр орны тоонд Монгол Улс багтсан байна.

Тодруулбал, Энэтхэгийн Эрүүл мэнд, Гадаад харилцааны сайд нар, Эм судлалын хүрээлэнгийн  албан тушаалтнууд болон вакциныг боловсруулж,  үйлдвэрлэн гарган авсан компанийн удирдлагууд нэгдүгээр сарын 18-ны даваа гарагт хуралдаж, дотооддоо үйлдвэрлэсэн вакциныг түнш ямар улсад хандивлах талаар ярилцаж, доорх шийдвэрийг гаргажээ. Энэ дагуу Монгол, Мяньмар, Бахрейн, Филиппин, Оман, Мальдив зэрэг арав орчим улсад Covaxin вакцины 8,1 сая тунг хандивлахаар шийдвэрлэсэн байна.

Энэ талаар Гадаад харилцааны сайд Н.Энхтайван “Гадаад харилцааны яам хоёр талын шугамаар Канад, ХБНГУ, Япон, ОХУ, БНХАУ, Энэтхэг, Австрали, зэрэг оронтой харилцаж, вакцин худалдаж авахад дэмжлэг авах чиглэлээр ажиллаж байна” гэж байв.

Энэтхэг улс дотооддоо үйлдвэрлэсэн коронавирусний эсрэг вакцинаа Монгол Улсад хандивлахаар болсон нь сайн мэдээ. Энэ нь хандиваар үнэгүй гэсэн үг юм. Харин хэр баталгаатай, ДЭМБ бүртгэсэн эсэх, монгол хүнд таарах уу, арай туршилтын туулай болгочихгүй биш биз гэсэн олон хардлага, шүүмжлэл явах нь гарцаагүй. Хүний эрүүл мэнд, амь настай холбоотой учраас энэ нь ч эрүүл, зөв жишиг юм. Энэ талаарх албаны мэдээллийг Засгийн газар, Сангийн яам, Эрүүл мэндийн яам ойрын хугацаанд өгөх нь дамжиггүй. 

У.Тэргэл