Ерөнхий сайд асан Ч.Сайханбилэг аливаа асуудлыг өөрийн биеэр бус зайнаас, шийдвэрлэхийг илүүд үзэж, албан тушаалтан, төр, засаг, хэн бүхэнд ил захидал илгээх нь жишиг болжээ. Шоронгоос, АНУ-аас, эмчлүүлж байхдаа, Интерполоор эрэн сурвалжилж байхад ч хээвнэг захидал илгээнэ. Тодруулбал,

-2021 оны нэгдүгээр сарын 18-ны өдөр буюу олон улсын Интерполоор эрэн сурвалжилж байх цагт ЗГХЭГ-ын дэд дарга Б.Солонгод хандан, түүний хэвлэлд өгсөн ярилцлагатай холбогдуулан Оюутолгойн гэрээтэй холбоотой асуудлаар тайлбар хийсэн ил захидлыг АНУ-аас илгээсэн юм.  Уг гэрээг хийснээр өрөнд орох биш харин ч ихээхэн ашиг хүртэнэ. Үүнийг цаг хугацаа харуулна. Б.Солонго эрхэм дүү эрх мэдэлтнүүдийн золиос болохвий, ажил хийсэн ч харлуулна хэмээн сургамжилсан, төр, засаг руу давшилсан агуулгатай байлаа.

-2020 оны долоодугаар сарын 20-ны өдөр “Х.Баттулгаа, чамд биш хуульд захирагдах сайхан цаг ирнэ гэсэн гарчигтай ил захидлыг мөн АНУ-аас илгээж байв. Тэрбээр тус улсад  эмчлүүлнэ гэж яваад сураггүй байснаа гэнэт л “Зэвүү, дургүй хоёр зэрэг хүрч байна. Улс төрийн зохиомол  хэрэгт ял тулгаж байгаад чи харамсах болно. Баттулгаа чамд захирагдахгүй, хуульд захирагдана” гэсэн заналхийллийн шинжтэй ил захидал илгээж байв.

-2018 оны дөрөвдүгээр сарын 12-ны өдөр Ч.Сайханбилэгийг Оюутолгойн гэрээг байгуулахдаа эрх мэдлээ урвуулан ашигласан хэрэгт буруутган 30 хоногийн хугацаатайгаар ШШГЕГ-ын харьяа Цагдан хорих 461 дүгээр ангид саатуулсан юм. Энэ үеэр тэрбээр “Том төслийг хөдөлгөснийхөө төлөө, улсдаа ихээхэн хэмжээний ашиг олж ирэх гэснийхээ төлөө өнөөдөр энд ингэж суугаадаа эгдүүцэж байна” хэмээн бухимдангуй бичсэн захидлыг төр, засагт илгээж байлаа.

-2018 оны дөрөвдүгээр сарын 4-нд Ч.Сайханбилэг тухайн үеийн Ерөнхий прокурор М.Энх-Амгалан, АТГ-ын дарга Х.Энхжаргалд нарт АНУ-аас захидал илгээн “Эх орондоо удахгүй очно. Дүү маань эмчилгээ хийлгэж байгаагаа албан ёсоор бичгээр мэдэгдсэн. Гэтэл оргон зугтсан гэх ташаа үндэслэлгүй мэдээлэл нийгэмд тархаад байна. Тиймээс уг захидлыг илгээлээ” гэж байв.

Ерөнхий сайд асан Ч.Сайханбилэгийг “Оюутолгой”-н хэргийн гол оролцогч гэдгээр нь АТГ-аас мөрдөн шалгах зуурт тэрбээр АНУ-руу дүүгээ эмчлүүлэхээр явсан. Ирэнгүүт нь нэг сар цагдан хориод сулласан ч тэрбээр өөрийгөө эмчлүүлнэ хэмээн АНУ-ыг гэр бүлээрээ зориод өнөөдрийг хүртэл хаа нэг захидлаар ил гарч, бусдаар нууцхан байгаа юм. Түүнийг Интерполоор эрэн сурвалжилж байгаа ба харин Ч.Сайханбилэгийн хувьд АНУ-аас улс төрийн орогнол хүссэн гэх нь ч бий.

Ямартай ч, Ерөнхий сайд асан Ч.Сайханбилэгийн үе үехэн дэлгэх захидлаас түүнийг эсэн мэнд байгааг, мөн зөв зүйл хийснийг нь Монголын төр, засаг, ард түмэн удахгүй хүлээн зөвшөөрнө гэдэгт найдаж байгааг харж болно. Харин асуудал гарах бүрд ил гарч захидал илгээх түүний хаа байгааг Интерпол ч  тогтоож дийлэхгүй байгаа бололтой.

У.Тэргэл