Энэ жил бол Ерөнхийлөгчийн сонгуультай жил. Энэ дагуу Ерөнхийлөгчийн сонгуулийг ирэх зургадугаар сарын 9-нд хийх товыг УИХ-ын байнгын хорооны гишүүдийн олонх өчигдөр дэмжсэн. Ийнхүү 2021 оны зургадугаар сарын 9-нд болох урьдчилсан тов гарсан Ерөнхийлөгчийн сонгуульд МАН, АН, ХҮН, МАХН гэсэн парламентад суудалтай дөрвөн нам нэр дэвшүүлэн өрсөлдөх боломжтой байгаа. Харин эдгээр намын гишүүдээс одоогоор нэр дэвших хүсэлтээ олон нийтийн хэрэгслээр дамжуулан илэрхийлсэн ганц хүн байгаа нь АН-ын гишүүн, УИХ-ын гишүүн асан Ц.Оюунгэрэл.

Түүний хувьд УИХ-ын сонгуульд өвдөг шороодсоноосоо хойш улс төрөөс зай барьж, өөрийн тэргүүлдэг “Нутгийн шийдэл” ТББ-ын “Жорлонгоо өөрчилье” төслийг сүүлийн хэдэн жилд амжилттай хэрэгжүүлж байгаа.

Харин Ерөнхийлөгчийн сонгуульд нэр дэвшихээ зарласнаас хойш улс төрийн хүрээний бас нэгэн сонирхолтой фигур болон дахин гарч ирлээ. Улстөрчийнхөө хувьд нэгэнт танил болсон тэрбээр хүний эрхийн хамгаалагч гэдгээрээ бусдаасаа ялгардаг байсан бол одоо Ерөнхийлөгчийн сонгуулийн горилогч гэдгээрээ олны хараанд орж ирж байна.

Нэгэнт л улс төрийн халуун сэдвийн нэг “Ерөнхийлөгчийн сонгуульд хэн өрсөлдөх бол” гэсэн сунгаанд орж ирсэн учраас Ц.Оюунгэрэлийн тухай мэдээлэл бүхэн соргог сонсогдож байгаа. Үүний нэг нь сүүлийн хэдэн жилд улстөрч Оюунгэрэл гэхээсээ илүүтэй “Жорлон”-гийн Оюунгэрэл гэтлээ нэршсэн түүний тэргүүлдэг “Нутгийн шийдэл” ТББ. 2007 онд байгуулагдсан энэ Төрийн бус байгууллагын Удирдах зөвлөлийн даргаар дээр хэлсэнчлэн Ц.Оюунгэрэл ажилладаг. Олон төсөл хөтөлбөрийг энэ хугацаанд хэрэгжүүлсэн “Нутгийн шийдэл” ТББ нь олон улсын байгууллагуудаас санхүүждэг гэдгийг тэдний цахим хуудаснаас харж болно.

Харин эдгээр хандивлагчдын нэг нь “Дэлхийн өсөлт” хэмээх байгууллага байгаа нь сонирхол татаж байна.

Олон улсын төрийн бус байгууллага болох энэ байгууллага нь 2008 оны гуравдугаар сард Монгол Улсад үйл ажиллагаа явуулж эхлэснээ зарлаж байсан юм. Гадаад хэргийн сайд асан Ц.Гомбосүрэн, нийтлэлч Баабар, анхны Ерөнхийлөгч П.Очирбат нарыг ТУЗ-даа багтаасан “Дэлхийн өсөлт” уул уурхай болон байгаль орчинд онцгой анхаарал хандуулах замаар Монгол Улсыг дэлхийд дээгүүр байр суурь эзлэсэн олон түмний амьжиргааны түвшин нь дээшилсэн улс орны нэг болгох бодлогыг дэмжинэ хэмээн зарлаж байлаа. “Дэлхийн өсөлт” Монголд орж ирснийг зарласан хэвлэлийн хурал дээр Гадаад хэргийн сайд асан Ц.Гомбосүрэн “Энэ байгууллагын төсөл нь эдийн засгийн өсөлтийг дэмжих, Засгийн газрын бодлогыг шинэ бөгөөд зохистой гольдролд оруулах арвин туршлага бүхий дэлхийн шилдэг мэргэжилтнүүд олон улсад хүлээн зөвшөөрөгдсөн эдийн засагчидтай хамтран ажиллах боломжийг монголчууд бидэнд олгож байна” гэж байв.

Үнэндээ ч “Дэлхийн өсөлт” байгууллага Монголын уул уурхай руу гүн анхаарлаа хандуулж тэр үед УИХ ид хэлэлцэж байсан Оюутолгойн гэрээний төслийг лоббидож байсан билээ.

Тэр байгууллагын лобби Оюутолгойн гэрээний төсөлд орж байсныг тухайн үеийн УИХ-ын гишүүд, Засгийн газрын гишүүд гэрчлэх биз ээ. Ийн арав гаруй жилийн өмнө Оюутолгойн гэрээг лоббидож асан “Дэлхийн өсөлт”-ийнхөн өдгөөгийн Ерөнхийлөгчийн сонгуульд нэр дэвшихээ зарлаад буй одоогоор цорын ганц горилогч болох Ц.Оюунгэрэлийн “Нутгийн шийдэл” ТББ-ын санхүүжүүлэгчээр мөн ажилладаг байсан гэсэн баримт гарч ирж байна.

С.Сүлд