Нэгдүгээр төрөхөд амаржсан нялх биетэй эхийг нярай хүүхэдтэй нь өчигдөр ХӨСҮТ рүү шилжүүлсэн. Ингэхдээ нярай биетэй эмэгтэйг нимгэн хувцастай зөөвөрлөсөн нь олон нийтийн дургүйцлийг төрүүлээд байгаа. Тэгвэл УОК-ын удирдлага огцорч байгаагаа мэдэгдлээ.

Шадар сайд Я.Содбаатар "Үүссэн нөхцөл байдалтай холбоотойгоор УОК-ын удирдлага огцорч байна. Өчигдрийн үйл явдалд гүнээ харамсаж чинь сэтгэлээсээ мэдэгдэл гаргасан юм. Шууд миний хариуцаж байсан асуудал биш ч гэлээ хүнлэг бус, сэтгэлгүй хүмүүс Монголын төрд цөөн ч гэсэн байгаад бас харамсаж байна. Хариуцлагатай албан тушаалд томилсон Ерөнхий сайд, ард түмнээсээ уучлалт хүсч байна. Өнгөрсөн өдөр болсон явдалд чин сэтгэлээсээ уучлалт хүсч байна. Бид коронавирусний халдвартай үр дүнтэй тэмцэж байлаа. Алдаа оноотой ч бидний тэмцэл стратегийн том алдаа гараагүй гэдгээ цохон тэмдэглье. Бид коронавирусний эсрэг амжилттай тэмцэж байгаа таван орны нэгээр нэрлэгдэж байсан. Коронавирусээр нэг ч хүн нас бараагүй. Энэ өвчин нийтийн өвчин болоогүй. Тун удахгүй олон улсад хүлээн зөвшөөрөгдсөн вакцинийг оруулж ирэхээр төлөвлөж байлаа. Бидний тэмцэл очих цэгээ харж байсан. Хүнд цаг үед хамтран ажилласан бүх байгууллагад талархал илэрхийлж байна. Ингээд Улсын онцгой комиссын даргын хувьд Шадар сайдын ажлаас чөлөөлөгдөх хүсэлтээ өгч буйгаа мэдэгдэж байнаа" гэлээ. 

Эрүүл мэндийн сайд Т.Мөнхсайхан "Коронавирусний эсрэг бид хоёргүй сэтгэлээр зүтгэлээ. Үүний хүчинд короанвирусын цар тахлыг хохирол багатай даван туулж байна. Олон жил бугшсан буруу тогтолцоог арилгахын тулд бүхий л хүчээ дайчлан ажиллалаа. Үүний үр дүнд тодорхой хэмжээний үр дүн гарсан. Та бүхэн гарсан үр дүнг харж байгаа байх. Эрүүл мэндийн салбарын 57 мянган ажилтан байгаа. Хэдэн хариуцлагагүй хүний үйлдлээс болж энэ олон мянган эрүүл мэндийн салбарынханг үгүйсгэж болохгүй гэдгийг хэлэхийг хүсч байна. Ингээд Эрүүл мэндийн сайдын хувьд албан үүргээсээ чөлөөлөгдөх хүсэлтээ Ерөнхий сайдад уламжилж байна" гэлээ.

Б.Баатар