Манай улс дотооддоо коронавирусийн халдварыг алдаад хоёр сар гаруйн хугацаа өнгөрч буй. Энэ хугацаанд халдвар орон нутагт тархсан ч халдварын голомтыг амжилттай хумьж, өдгөө халдваргүй ногоон бүс болсон гэдгээ зарлаад амжсан.

Гэтэл Улаанбаатар хотод халдвар голомтлон гарч, хүн амын дундаас хүртэл халдвар илэрсээр байгаа юм. 

Өнөөдрийн байдлаар Улаанбаатар хотын голомтод нийт 741 тохиолдол бүртгэгдээд байна.

Үүнтэй зэрэгцэн халдварт өртсөн иргэдтэй хүнлэг бус харьцсан тохиолдол гарч дөнгөж сая Улсын онцгой комиссын удирдлага огцорч байгаагаа мэдэгдэв. Иргэд ч үүнийг шаардаж, өглөөнөөс эхлэн Төв талбай дээр жагссан.  

Тэгвэл яг одоо Төв талбай дээр жагсч буй иргэд Нийслэлийн Онцгой комиссын дарга Д.Сумъяабазарыг огцрох ёстой хэмээн үзэл бодлоо илэрхийлж эхэллээ.

Өнгөрсөн шөнө нэгдүгээр амаржих газарт амаржсан нялх биетэй эмэгтэйг зөөвөрлөхдөө хүнлэг бус харьцаж, нимгэн хувцастай авч явсан нь олны дургүйцлийг төрүүлсэн. Улмаар УОК-ын удирдлага хүртэл уучлалт хүсч, огцорч байгаагаа мэдэгдэж байхад хамгийн том голомт болж, халдвар гарч буй Улаанбаатар хотын Засаг дарга, НОК-ын удирдлага болох Д.Сумъяабазар юу ч дуугарахгүй, хөшигний ард үлдэж байгаад иргэд бухимдаж байгаа юм.   

Б.Баатар