Коронавируснийн халдвар авсан нялх биетэй ээжийг Нэгдүгээр амаржих газраас ХӨСҮТ рүү шилжүүлэхдээ эмч, мэргэжилтнүүд хүнлэг бус хандсан зэрэг асуудлаар Шадар сайд Я.Содбаатар, Эрүүл мэндийн сайд Т.Мөнхсайхан нар үүрэгт ажлаасаа чөлөөлөгдөх хүсэлтээ гаргаад буй. Үүнийг ч өчигдөр Төв талбай дээр жассан иргэд шаардаж байсан учир тэд ийм шийдвэр гарахад хүрсэн биз.

Тэгвэл дээрх үйл явдалтай холбоотойгоор Нийслэлийн Засаг дарга Д.Сумъяабазар захирамж гаргаж, НЭМГ-ын дарга Л.Төмөрбаатарыг ажлаас нь чөлөөлөх шийдвэр гаргав. Харин Нэгдүгээр амаржих газрын даргыг НЭМГ-ын дарга томилдог тул тус албан тушаалыг түр орлон гүйцэтгэж буй НЭМГ-ын дэд дарга Л.Зэндмаа тушаал гаргаж, Нэгдүгээр амаржих газрын дарга Г.Баясгаланг албан тушаалаас чөлөөлсөн байна.

Иргэдийн эсэргүүцэлтэй тулгарч, "дайралтад" орсон албан тушаалтнууд ийнхүү суудлаасаа буулаа.

Тэгвэл коронавирусний хамгийн том голомт болоод буй Улаанбаатар хотын Засаг дарга, НОК-ын дарга Д.Сумъяабазар ийнхүү доод албан тушаалтнуудаараа "туг тахиад" энэ бүхний ард чимээгүй үлдэхээр шийдсэн бололтой. 

Алдаа оноо дүгнэх жингийн туухай дээр дээрх хүмүүсийг хэмжвэл НОК-ын дарга Д.Сумъяабазар тийм ч цэвэр үлдэх ёстой хүн биш гэдэгтэй маргах хүн ховор биз. Тиймээс ч өчигдөр Төв талбай дээр жагссан иргэд түүнийг огцрохыг шаардаж байв. 

Харин дээрх шаардлагатай тулгарсан Хотын дарга НЭМГ-ын дарга Л.Төмөрбаатарыг ажлаас нь чөлөөлөх шийдвэрийг ундуй сундуй гаргасан нь мөн л олны анхаарлыг татаж, түүгээр "туг тахилаа" хэмээж буй юм. 

Тодотговол, Эрүүл мэндийн сайд өчигдөр өдөр Хотын дарга Д.Сумъяабазарт хандаж НЭМГ-ын дарга Л.Төмөрбаатар, Нэгдүгээр амаржих газрын дарга Г.Баясгаланд хариуцлага тооцож, албан тушаалаас нь чөлөөлөхийг хүсэж албан тоот хүргүүлсэн байдаг. Гэсэн ч Албан тоотын хариуд "Нийслэлийн Засаг дарга Д.Сумъяабазар “Албан тушаалаас чөлөөлөхгүй, сануулга өгнө” гэсэн хариуг утсаар өгсөн гэж ЭМЯ-наас мэдээлж байсан билээ. Гэсэн ч 20:30 цагийн үед ажлаас чөлөөлөх шийдвэр гаргаж, олон нийтэд ил болгосон нь ийнхүү хардахад хүргэж байгаа юм. 

Коронавирусний голомт болоод буй Улаанбаатар хотын Засаг дарга С.Сумъяабазар ядаж л хүн чанар гаргаад хүнлэг бус харьцсан нялх биетэй ээж, нийслэлийн иргэн болж мэндэлсэн бяцхан хүү хоёроос уучлалт хүсэх сэтгэл гаргаасай. 

Б.Баатар