УИХ-ын чуулганы нэгдсэн хуралдаан 17.00 цагт 52,7 хувийн ирцтэйгээр эхэллээ. Чуулганаар Монгол Улсын Ерөнхий сайдыг огцруулах тухай асуудлыг хэлэлцэж, гишүүдийн асуулт, хариултыг сонсч  байна.

Энэ үеэр УИХ-ын гишүүн Г.Дамдинням: “Хууль шүүхийн албан тушаалтнуудын өргөдлийг нь авч томилдог, хууль шүүхийг завхруулдаг Ерөнхийлөгчтэй хамтарч ажиллаж чадахгүй гэдгээ хэлье.

Ард түмний уур бухимдал эцэстээ туллаа. Амьдрал сайнгүй байгаа. Дэлхий даяараа айдастай цар тахлыг давж байна. Коронавирусний халдвар илрээд  хоёр жилийн хугацаа үдэж байна. 

Эхний нэг жилд халдварыг гаднаас оруулж ирэхгүйгээр Засгийн газар сайн ажилласан. Ойрын хэдэн сард дотооддоо алдан нэлээдгүй арга хэмжээ авч байгаа. Энэ хүнд үед ард түмний бухимдал дээр улс төр хийж, увайгүй загнаж байгаа хүн энд өөдөөс хараад байж байна. Би сонгогчдодоо шударга ёсыг тогтооно гэж хэлж орж ирсэн. Та нар шиг хулгай хийж, хууль бус бизнес хийгээгүй. Хүн шиг зүтгэж, амьдрахын төлөө зүтгэж яваа аавын хүү байна.  Үүнээсээ ичихгүй, шударга ёсны тэмцлээсээ ухарна гэж байхгүй. У.Хүрэлсүх сайдаа, парламентдаа ороод ирээрэй, мөр зэрэгцээд зарим нэг нөхөдтэй шударга тэмцье. Шударга  ёс ялах ёстой” гэлээ.

У.Тэргэл