УИХ-ын гишүүн С.Одонтуяа "Өнөөдөр бүх зүйл Ардчилсан нам, Ерөнхийлөгчийн буруу болоод явчихлаа. Үүнийг би үнэхээр ойлгохгүй байна. Энэ бүхэн өнөөдөр урьдаас төлөвлөсөн том жүжиг л гэж харагдаж байна. Цаашид ч Солонгос кино шиг олон ангитай байх болно. Үүнд Ардчилсан нам ч Ерөнхийлөгч ч буруугүй. Энэ нь МАН-ын дотоодын зөрчил дээд цэгтээ тулсны илрэл. Монгол Улсын том том ордуудын төлөөх тэмцэл, албан тушаалын тэмцэл зэрэг эрчүүд эзэгнэсэн улс төрийн өмнөх хойдох өшөө авалт энэ бүхэнд хүргэлээ гэж харж байна. Ардчилсан намын тэмцэл ил байдаг. Бидэнд булаацалдах зүйл тамганаас өөр байдаггүй.  

Улсын төсвийн 10 тэрбумаар бариулсан байр Ардчилсан намд байхгүй. Гэтэл энд маш том намын зөрчил явж байна. Ард түмэн ээжүүдийн төлөө итгэл үнэмшилтэй хандсанд баярлаж байгаа. Улс төрчид энэ бүхнийг анх удаа харж байгаа мэт амьдралаас тасарсан зүйл битгий ярьж бай. ЭХЭМҮТ-ийн эхчүүдийн төрөх тасгийг очоод хараарай.

У.Хүрэлсүх сайдыг коронавирусний эсрэг тэмцэж, эдийн засгийн хямралаас гаргаж чадах юм байна гэж ард түмэн итгэсэн. Гэтэл зургаахан сар болоод ажлаа дундаас нь хаяад явж байгаад харамсаж байна. Монголын төр тогтвортой байх ёстой. МАН 11 эмэгтэй гишүүнтэй. Энэ нь У.Хүрэлсүхийн ач. Гэтэл гадаадад байгаа иргэддээ сэтгэл гаргахгүй байгаад харамсаж байна" гэлээ. 

Б.Баатар