УИХ-ын чуулганы нэгдсэн хуралдаан 17.00 цагт 52,7 хувийн ирцтэйгээр эхэллээ. Чуулганаар Монгол Улсын Ерөнхий сайдыг огцруулах тухай асуудлыг хэлэлцэж, гишүүдийн асуулт, хариултыг сонсч  байна.

УИХ-ын гишүүн Х.Нямбаатар: “Шударга бусын хонгилыг нураахын тулд Шүүхийн тухай болон Авлигын эсрэг хуулиудаа шинэчлэн батлах ажлыг энэ Засгийн газар хийлээ. Монгол Улсын Ерөнхийлөгчид төвлөрсөн эрх мэдлийг салгах гэдэг тийм ч амар биш юм байна.

Ерөнхийлөгчийн зүгээс Шүүхийн тухай хуулиа тат гэдэг шахалтыг хууль санаачлагчийн хувьд надад удаа дараа тавьж байсан. Төрийн ордны зүүн жигүүрийн гурван давхарт шүүгч ирж, хэнд хэдэн жилийн ял өгөх вэ гэж үүрэг даалгавар авдаг, тэр ёсыг халахын тулд Ерөнхийлөгчийн тавьсан шахалт, шаардлагыг бид биелүүлээгүй. Харин ч эсрэгээрээ Шүүхийн болоод авлигын эсрэг хуулиудаа батлууллаа.

Цаашид хуулиудын хэрэгжилт Монгол Улсад шударга ёсыг тогтооход том алхам болох байх. Сүхбаатарын талбайд өчигдөр болсон жагсаал бол эхний удаад яахын аргагүй иргэдийн үгээ хэлэх, үзэл бодлоо илэрхийлэх, эвлэлдэн нэгдэх тэр индэр нь байсан. 

Харамсалтай нь, сүүлдээ улс төрийн зорилгоор ашиглаж, тодорхой үйл явдлууд болсон гэдгийг би ХЗДХ-ийн сайдын хувьд хариуцлагатайгаар мэдэгдэж байна.

У.Тэргэл