УИХ-ын чуулганы нэгдсэн хуралдаан 17.00 цагт 52,7 хувийн ирцтэйгээр эхэллээ. Чуулганаар Монгол Улсын Ерөнхий сайдыг огцруулах тухай асуудлыг хэлэлцэж, гишүүдийн асуулт, хариултыг сонсч  байна.

Энэ үеэр УИХ-ын гишүүн Сү.Батболд “Монгол Улсын эв нэгдлийг илэрхийлэгч дуу хоолой болсон хүн намайг Оюутолгойн гэрээтэй холбогдуулан сая үг хэлэхдээ гүтгэлээ. Харин ч манай Засгийн газар сайжруулах зүйлийг хийсэн. Жинхэнэ утгаар нь Монгол Улсын  эрх ашгийг сайжруулсан өөрчлөлт хийсэн юм шүү. Миний хувьд Ерөнхий сайдын хэлж байгаатай санал нэг байна. Монгол төр том төслүүдээ нээлттэй шалгаж, ард түмэндээ танилцуулдаг байх хэрэгтэй. Тэгж байж нүгэлтэй бол нүглээ үүрдэг ийм тогтолцоо ус агаар шиг хэрэгтэй гэдгийг сүүлийн үйл явц бүрэн харуулж байна. Миний хувьд төрөөс хулгай хийж амьдрах ямар ч шаардлага байхгүй. 30 гаруй жил бизнес хийн амьдралаа төвхнүүлсэн.

Олон тэрбумын ашигтай ажилладаг, үндэсний хувийн компанид тэгж хулгай хийх сэтгэхгүй байхгүй. Өөрөөсөө алдаагаа эрж дүгнэхийн оронд бусад руу чихэж, гүтгэж байгааг эсэргүүцэж байна. Оюутолгойтой холбосон гүтгэлгийг гаднын хуулийн байгууллагаар хийлгээд гадна, дотнын шүүхэд өгөөд сошиалаар цацан, харлуулах бохир технологи ашиглаж байгаа нь хаанаас явуулж буй нь ойлгомжтой байна.

Өөрсдийн хууль хяналтын байгууллагууд байсаар атал гадныхнаар хийлгэчихээд дарамтлаад сууж байгаа  хүн үнэхээр ардчилсан тогтолцоо руу явах юм уу, дарангуйлал руу явах юм уу гэдгийг хэлээд өгөөч. Засгийн газрын тэргүүн нийтийн нийтлэг эрх ашгийн төлөө ухамсартай, хариуцлагатай алхам хийж байгааг зөв зүйтэй гэж харж байна“ гэлээ.

У.Тэргэл