Дөнгөж төрөөд удаагүй эхийг, хүүгийн хамт өвлийн дүн хүйтэнд хөнгөн нимгэн авч явсан нь нийгмийг цочирдуулж, бухимдуулсан. Энэ дагуу Төв талбайд залуус сэтгэл зүрхнийхээ дуудлагаар цуглаж, үзэл бодлоо илэрхийлж, УОК-ыг огцрохыг шаардсан билээ. Жагсаал анх тайван үргэлжилж байсан ч үдээс хойш ширүүсч, оройдоо талбайд согтуу хөлчүү залуучууд олноор үзэгдэх болж, УОК-оос гадна Засгийн газрыг огцруулья, ордонд оръё, дайръя гэх уриалан дуудсан, үймээнд турхирсан шинжтэй болж ирсэн.

Хууль, хүчний байгууллагынхан ч асуудлыг тайвнаар зохицуулах гэж ихээхэн чармайсан. Гэтэл өчигдрийн чуулганаар энэ бүхний ард түмний эв эеийг илэрхийлэгч Монгол Улсын Ерөнхийлөгч байсан нь тов тодорхой болсон билээ.

У.Хүрэлсүх Ерөнхийлөгчийг энэ бүхнийг санхүүжүүлж, турхирч, үймээн самуун дэгдэхэд хүргэж болзошгүй нөхцөл байдал үүссэн учраас албан тушаалаа өгөх нэг шалтгаан нь байсан гэдгээ хэлсэн. Мөн хууль хүчний байгууллагууд энэ асуудлаа өөрсдөө гаргаж тавих биз. Ерөнхийлөгч Х.Баттулгад хариуцлагын асуудлыг ярих ёстой гэж байлаа. Х.Нямбаатар гишүүн ч долоодугаар сарын 1-нийг давтах гээд байгаа  хүн нь Ерөнхийлөгч. Жагсаалын үеэр өдөөн турхирч байсан хүмүүсийн ард түүнийг байсныг нотлох олон баримт бийг Хууль зүйн сайдын хувиар хатуу хэлье гэж байв.

Монгол Улсын Ерөнхий сайд У.Хүрэлсүх Ерөнхий сайдын албанаас огцорч буйгаа мэдэгдсэн хэвлэлийн хурлын үеэр “Ерөнхийлөгчид итгэл үзүүлэх эсэхийг УИХ-аар хэлэлцүүлнэ” гэсэн билээ.

Ерөнхийлөгчид итгэл үзүүлэх эсэхийг Үндсэн хуулийн 35 дугаар зүйлийн 2-т зааснаар “Ерөнхийлөгч тангаргаасаа няцаж Үндсэн хууль, Ерөнхийлөгчийн бүрэн эрхийг зөрчвөл Үндсэн хуулийн Цэцийн дүгнэлтийг үндэслэн УИХ-аар хэлэлцэж чуулганд оролцсон нийт гишүүдийн дийлэнх олонхын саналаар огцруулна” гэж заасан. Харин Ерөнхийлөгчийн тухай хуулийн 7 дугаар зүйлийн 2-т “Ерөнхийлөгч тангаргаасаа няцаж Үндсэн хууль, бусад хууль, Ерөнхийлөгчийн бүрэн эрхийг зөрчсөн тухай асуудлыг УИХ-ын нийт гишүүний гуравны нэг нь албан ёсоор тавибал Үндсэн хуулийн 35 дугаар зүйлийн 2 дахь хэсэгт заасны дагуу УИХ хэлэлцэж Ерөнхийлөгчийг огцруулах эсэхийг шийдвэрлэнэ” хэмээн заажээ.

Хэрвээ МАН одоогийн төрийн тэргүүнийг Үндсэн хууль зөрчиж, Ерөнхийлөгчийн тангаргаасаа няцсан хэмээн үзвэл энэ нь эхлээд Үндсэн хуулийн Цэцээр орох ёстой гэдэг нь эдгээрээс харагдаж байна. Тодруулбал, Ерөнхийлөгчид итгэл үзүүлэх эсэх асуудлыг эхлээд Үндсэн хуулийн Цэцийн 9 гишүүн шийдэх нь ээ.

Н.Чинбатыг 2017 онд, Д.Солонго, Ш.Цогтоо нарыг 2013 онд Дээд шүүхийн саналаар, Д.Одбаярыг 2016 онд, Ш.Солонгыг 2018 онд, Г.Баясгаланг 2019 онд УИХ-ын саналаар, Ц.Нанзаддорж, Г.Туулхүү, Б.Буяндэлгэр нарыг Ерөнхийлөгч Х.Баттулгын саналаар 2018 онд Үндсэн хуулийн Цэцийн гишүүнээр томилж байсан билээ.

Үндсэн хуулийн Цэц дүгнэлтээ гаргаад оруулаад ирвэл УИХ-ын нийт гишүүдийн 56 нь л  дэмжихэд л Х.Баттулгыг хугацаанаас нь өмнө огцруулах боломжтой болох юм. 

У.Тэргэл