Монгол Улсын 31 дэхь Ерөнхий сайд ёс зүйн хариуцлага хүлээж өөрийн хүсэлтээрээ огцроод буй. Ерөнхий сайд энэ үеэрээ нэгэн ноцтой мэдэгдэл хийсэн нь олны анхаарлыг татаж байна.
Тодотговол тэрбээр "Итгэж, найдаж явсан Монгол Улсын Ерөнхийлөгч Х.Баттулга залуусыг үймээнд турхирч, санхүүжүүлж, улстөржүүлсэнд миний итгэл найдвар үнэхээр алдарлаа. Засгийн газрыг тогтворгүй байлгах, нийтийн эмх замбараагүй байдалд өдөөн турхирах ийм зүйл төлөвлөж байгааг үгүйсгэхгүй. Улс төрийн янз бүрийн зүй бус харьцаа үүсэхвий, үүнээс болж олон нийтийг хамарсан үймээнд татагдан орохвий, монгол хүн амь насаа алдахвий гэхээс сэрэмжилж байгаа юм. Долоодугаар сарын 1-ныг бид мартаагүй. Ийм явдал дахин бүү гараасай гэж хүсч байна. Миний шийдвэр ч үүнтэй холбоотой. Монгол Улсын Ерөнхийлөгч эв нэгдлийг илэрхийлэгч байдаг. Харамсалтай нь, энэ ажлаа хийж чадахгүй, зөвхөн сонгууль руу чиглэсэн улс төрийн акцыг удаа дараа хийж ирлээ. Ард түмэн надаар хэлүүлэлтгүй мэдэж байгаа байх. Цаашдаа ийм зохисгүй үйлдэл битгий гаргаасай гэж хүсч байна. Мөн энэ үйлдэлд нь хариуцлага тооцох ёстой гэж намын даргын хувьд бодож байгаагаа илэрхийлье" хэмээсэн.
Ерөнхий сайдын энэхүү мэдэгдэл баттай бол Монгол Улсын Ерөнхийлөгч хариуцлага хүлээх ёстой. Үүнийг ч УИХ-ын гишүүн Т.Доржханд чуулганы нэгдсэн хуралдааны үеэр онцолсон. Тэрбээр энэ талаар "Ерөнхийлөгч үнэхээр өчигдрийн жагсаалыг санхүүжүүлсэн эсэхийг Ерөнхий сайд батлах хэрэгтэй. Хэрэв энэ нь батлагдвал Ерөнхийлөгч үүргээ зөрчсөн гэж үзээд хариуцлага тооцох асуудлыг тавих болно" гэсэн юм.
Хэрэв Ерөнхийлөгч Х.Баттулга Монголын ард түмний эв нэгдлийг илэрхийлэгчийн үүргээ умартаж, жагсаал цуглааныг ивээн тэтгэж, санхүүжүүлсэн бол ямар хариуцлага хүлээх вэ.
Үндсэн хуулийн 30 дугаар зүйлд, "Монгол Улсын Ерөнхийлөгч бол төрийн тэргүүн, Монголын ард түмний эв нэгдлийг илэрхийлэгч мөн" хэмээн заажээ.
Мөн тус хуулийн 32 дугаар зүйлийн 2-т зааснаар: Ерөнхийлөгч сонгогдсоноосоо хойш гуч хоногийн дотор “Монгол Улсын тусгаар тогтнол, бүрэн эрхт байдал, ард түмнийхээ эрх чөлөө, үндэсний эв нэгдлийг эрхэмлэн хамгаалж, Үндсэн хуулийг дээдлэн сахиж, Ерөнхийлөгчийн үүргийг шударгаар биелүүлэхээ батлан тангараглая” хэмээн Улсын Их Хуралд тангараг өргөдөг.
Харин...
Үндсэн хуулийн 35 зүйлийн 2-т Ерөнхийлөгч тангаргаасаа няцаж Үндсэн хууль, Ерөнхийлөгчийн бүрэн эрхийг зөрчвөл Үндсэн хуулийн цэцийн дүгнэлтийг үндэслэн Улсын Их Хурлаар хэлэлцэж чуулганд оролцсон нийт гишүүний дийлэнх олонхын саналаар огцруулна,
Ерөнхийлөгчийн тухай хуулийн 7 зүйлийн 2-т Ерөнхийлөгч тангаргаасаа няцаж Үндсэн хууль, бусад хууль, Ерөнхийлөгчийн бүрэн эрхийг зөрчсөн тухай асуудлыг Улсын Их Хурлын нийт гишүүний гуравны нэгээс доошгүй нь албан ёсоор тавибал Үндсэн хуулийн 35 дугаар зүйлийн 2 дахь хэсэгт заасны дагуу Улсын Их Хурал хэлэлцэж Ерөнхийлөгчийг огцруулах эсэхийг шийдвэрлэнэ хэмээн тус тус заасан байна.
Өөрөөр хэлбэл, Ерөнхийлөгч тангаргаасаа няцаж, хууль зөрчсөн гэж ҮХЦ дүгнэвэл УИХ-ын гишүүдийн олонхын саналаар огцруулах юм.
Тэгвэл...
Үндсэн хуулийн цэц Ерөнхийлөгчид итгэл үзүүлэх үү. Монгол Улсын Үндсэн хуулийн цэцийн бүрэлдэхүүнд хэн хэн багтдаг вэ. Монгол Улсын Үндсэн хуулийн цэцийн дарга Н.Чинбат, Гишүүн Д.Солонго, Ш.Цогтоо, Д.Одбаяр, Ш.Солонго, Б.Буяндэлгэр, Ц.Нанзаддорж, Г.Туулхүү, Г.Баясгалан нар багтдаг байна.
Харин тэднийг Ерөнхийлөгчид итгэл үзүүлэх магадлалтай гэх таамаг хөвөрч эхэллээ.
Тодруулбал, Н.Чинбатыг 2017 онд, Д.Солонго, Ш.Цогтоо нарыг 2013 онд Дээд шүүхийн саналаар, Д.Одбаярыг 2016 онд, Ш.Солонгыг 2018 онд, Г.Баясгаланг 2019 онд УИХ-ын саналаар, Ц.Нанзаддорж, Г.Туулхүү, Б.Буяндэлгэр нарыг Ерөнхийлөгч Х.Баттулгын саналаар 2018 онд Үндсэн хуулийн Цэцийн гишүүнээр томилж байсан аж.
Б.Баатар
Сэтгэгдэл (1)