Монгол Улсын Ерөнхийлөгч Цахиагийн Элбэгдорж Японы Олон улсын найрамдал, солилцооны зөвлөлийн дэд тэргүүн Н.Ито тэргүүтэй төлөөлөгчдийг хүлээн авч уулзлаа. Төлөөлөгчдийн бүрэлдэхүүнд банк санхүү, дэд бүтэц, эрчим хүч, анагаах ухаан зэрэг чиглэлээр үйл ажиллагаа явуулдаг Японы томоохон хувийн хэвшлийн төлөөлөгчид багтсан байна.

  Ноён Н.Ито уулзалтын эхэнд хэлэхдээ “Бид бүхнийг хүлээн авсан эрхэм хүндэт Ерөнхийлөгч танд талархал илэрхийлье. Хоёр орны харилцаа сүүлийн жилүүдэд эрчимтэй хөгжиж, олон салбарт хамтын ажиллагаа өргөжин тэлсээр байгаад сэтгэл хангалуун байна. Тэр дундаа боловсролын салбарын харилцаа эрчимтэй өргөжин тэлж байна. Одоогоор Япон Улсын зардлаар Монголын 1200 гаруй оюутан сурч байгаа нь үүнийг гэрчлэх буй за. Цаашид бид харилцаагаа улам бүр гүнзгийрүүлэн зам харилцаа, дэд бүтцийн салбарт идэвхитэй хамтран ажиллах сонирхолтой байна” гэв.

 Мөн Н.Ито цааш дурдахдаа “Манай улсад 2011 оны 3-р сарын 11-нд болсон байгалийн гамшгийн улмаас атомын цахилгаан станц сүйрэхэд хүрсэн билээ. Энэ хүнд хэцүү цаг мөчид Монголын ард түмэн бидэнтэй цуг байж, бүх талаар дэмжиж тусалж байсанд гүнээ талархаж байна” хэмээв.

  Ерөнхийлөгч Ц.Элбэгдорж хэлэхдээ “Японы Олон Улсын Найрамдал, Солилцооны Зөвлөлийн төлөөлөлтэй уулзаж байгаадаа баяртай байна. Бид Япон улстай харилцаа, хамтын ажиллагаагаа бүх талаар хөгжүүлэхийг зорьдог. Монгол Япон Улсын хооронд диломат харилцаа тогтоосны 40 жилийн ой тохиож байгаа. Энэ үеэр та бүхэн айлчилж ирсэн нь онцлууштай юм. Японы ард түмэнд тохиолдсон байгалийн гамшгийг даван туулахад нь бид бүхий л талаар анхаарлаа хандуулж ирсэн. Талууд 2010 онд стратегийн түншлэл эхлүүлэхээр тохиролцсон. Энэхүү хэлэлцээрийн хүрээнд эдийн засаг, хөрөнгө оруулалтын тал дээр цаашид тдэвхитэй хамтран ажиллана гэдэгт итгэж байна” гэв.

  Японы Олон улсын найрамдал, солилцооны зөвлөл нь Япон Улс гадаадын улс орнууд, ялангуяа Азийн орнуудтай найрсаг харилцаа хөгжүүлэхэд тус дөхөм үзүүлэх зорилгоор 1983 онд байгуулагдсан бөгөөд өнөөдөр 1500 гаруй гишүүнтэй үндэсний хэмжээний томоохон байгууллага юм.