УИХ-ын гишүүн Сү.Батболдтой холбоотой мэдээлэл сүүлчийн өдрүүдэд хөвөрч, Монгол Улсын Ерөнхийлөгч чуулганы индэр дээрээс хүртэл элдвээр цоллов. Давхцан Монгол Улсын Засгийн газар Ерөнхий сайд асан Сү.Батболдыг их хэмжээний авлига, хууль бус хөрөнгө нуун дарагдуулсан хэргээр Нью-Йоркийн шүүхэд өгсөн тухай мэдээлэл “Global anti Corruption” вэб сайтад гарч, удалгүй хэдхэн хоногийн өмнө Монголын Засгийн газар  нэхэмжлэлээ буцаан татсан талаар шуугьж эхэллээ. Энэ талаар УИХ-ын гишүүн асан Г.Уянга өөрийн цахим хуудастаа “Хэдхэн хоногийн өмнө Нью-Йоркийн шүүхээс Сү.Батболдын эсрэг гаргасан нэхэмжлэлээ Монголын Засгийн газар буцаан татжээ. Үүнээс “Оюутолгой”-г цааш хэрхэн үргэлжлүүлэхийг харж л байя. Ямар ч засаг гарсан Сү.Батболдын  гарт гэж эс хэллүү. Шүтээд, сонгоод, өмөөрөөд, талцаж хэрэлдээд амьдраад байж дээ” хэмээн жиргэсэн билээ.

Энэхүү дуулиан тасраагүй байтал УИХ-ын гишүүн Сү.Батболд “Эрдэнэт үйлдвэр” ТӨҮГ-т 713 тэрбум төгрөгийн хохирол учруулсан шүүхийн мэдээлэл гарч эхэллээ. Тодруулбал, Төрийн өмчийн бодлого зохицуулалтын газар, “Эрдэнэт үйлдвэр” ТӨҮГ, “Эрдэнэс Оюутолгой” ХХК-ийн нэхэмжлэлтэй иргэний хэргийг Баянзүрх дүүргийн шүүх 2020 оны аравдугаар сарын 28-ны өдрийн анхан шатны хуралдаанаараа хэлэлцээд, Сү.Батболд болон түүний хүрээлэл гэрээний үүргээ биелүүлэлгүй 250 сая ам.доллар буюу 713 575 000 000 төгрөгийн хохирол учруулсныг нөхөн төлүүлэх шийдвэр гаргажээ.

Сү.Батболд гишүүний хувьд “Миний нэр төрд удаа дараа халдлаа. Миний хувьд авлига авч, төрөөс идэж уух ямар ч шаардлагагүй. 30 жил хувийн бизнес эрхэлсний хувьд  хөл дээрээ хэдийнэ боссон. Үндэсний компанийн хувьд нэг жилд тэрбумын татварыг улсад төлдөг. Тиймээс хулгай хийх сэтгэхүй ч байхгүй. Гаднын байгууллагаар хуурамч мэдээлэл бэлдүүлж, цацаж, намайг гүтгэж байгаа нөхөд ялангуяа Ерөнхийлөгч удахгүй үнэнд гүйцэгдэнэ” хэмээсэн билээ.

Энэ мэтчилэн Ерөнхий сайд асан, УИХ-ын гишүүн Сү.Батболд болоод түүний тойрон хүрээлэгчидтэй холбоотой мэдээлэл өдөр бүр шинээр гарч ирж, Ерөнхийлөгчийн сонгууль дөхөж буйн дохиог өгч байна. Мөн энэ бүхэн “Оюутолгой”-той ч холбоотой өрнөж буйг олон эх сурвалж хэлж байгаа. Тиймээс тодорхойгүй олон асуудлын учиг Ерөнхийлөгчийн сонгуулийн өмнө тайлагдаж, эзэн нь ч ил гарах биз ээ.

У.Тэргэл