Дөнгөж төрсөн эмэгтэйд хүнлэг бус хандаж халаад, тавчиктай нь амыг нь даран хүүхдийг нь ороогоод Улсын нэгдүгээр төрөх эмнэлгээс яаралтай авч явсан талаар цахим сүлжээнд шуугиан тарьж, иргэд эсэргүүцлээ илэрхийлэн тайван жагсаал хийсний дүнд Засгийн газрын тэргүүн нийт ард иргэдээс хүлцэл өчиж, танхимаараа огцорсон нь өнгөрсөн долоо хоногийн онцлох үйл явдал байлаа. Ингэснээр хамгийн богино настай Засгийн газраар түүхэнд үлдэж байна.

2020 оны УИХ-ын сонгуулийн үр дүнгээр байгуулагдсан У.Хүрэлсүхийн Засгийн газар ерөнхий чиг үүргийн зургаа, чиглэлийн найм нийт 14 яамтай ажилласан. Төрийн үйл ажиллагаа тасралтгүй үргэлжлэх ёстой тул огцорсон сайдууд түр орлон гүйцэтгэгчээр дараагийн сайд томилогдох хүртэл ажиллах ёстой. Үүнтэй холбогдуулан энэ долоо хоногт анхаарал татаж байгаа чухал зүйл бол салбаруудын дараагийн сайд хэн бэ гэдэг асуудал.

Албан бус байдлаар ихэнх яамдын сайд нарыг улираан томилох бөгөөд хэл ам татлаад байгаа хэд хэдэн сайд нарыг сольж магадгүй гэсэн яриа бий.

Ингээд Монгол Улсын 31 дэх Ерөнхий сайд У.Хүрэлсүхийн танхимаас сайн болон тааруу ажилласан гэж иргэдээр дүгнүүлсэн зургаан сайдыг онцолж байна.

У.Хүрэлсүхийн танхимыг өргөж, залуу шинэ боловсон хүчнээр хүч сэлбэсэн гэж иргэд болоод салбарынхнаас нь сайшаалын үг харамгүй түгээж байгаа сайд бол Эрүүл мэндийн сайдаар ажилласан Т.Мөнхсайхан. Түүнийг сайдаар ажилласан хагас жилийн хугацаандаа салбарынхаа олон жил бугласан идээ бээрийг шахаж, зоримог ажилласан хэмээн дүгнэсэн байна лээ. Ер нь өнгөрсөн хугацаанд ч тэр байгууллагыг зөв хүн удирдвал хэрхэн өөдтэй, өнгөтэй явдагийн жишээг ч харуулсан гэхэд болно. Төрөөд удаагүй эмэгтэйд хүнлэг бус хандсан асуудлаар салбарын сайд нь хариуцлага хүлээж, огцрох хүсэлтээ өгсөн ч эмч, мэргэжилтнүүд нь сайдаа буцаан томилуулах хөдөлгөөн өрнүүлж буй. Эндээс үзвэл салбар бүр хэнээр удирдуулах эсэхээ сонгодог зөв жишиг рүү орох гэж байна уу гэлтэй.

Дараагийн танхимаа чимж, гал цогтой, богино хугацаанд бүтээлч ажилласан сайдаар Хөдөлмөр, нийгмийн хамгааллын сайд А.Ариунзаяа нэрлэгдээд байна. Тэрбээр салбарынхаа үйлчилгээ, хүртээмжийг сайжруулахын тулд шаргуу ажилласан. Ажилчныхаа төрсөн өдрийн мэндчилгээн дээр тамга дарж төр, хувийн ажлаа ялгаагүй хэмээн хэсэг баалуулаад авсан ч ажил үйлээрээ цайруулж чадсан нэгэн.

Харин удаах онцлох хүн бол Эрчим хүчний сайд Н.Тавинбэх. Засгийн газар царт тахлын хүнд үед иргэдэд үүсэх дарамтыг бууруулах зорилгоор өнгөрөгч оны арванхоёрдугаар сарын 1-ээс айл, өрхийн цахилгаан, дулаан, тог, усны мөнгийг энэ оны долдугаар сарын 1 хүртэл тэглэх шийдвэр гаргасан. Уг шийдвэртэй холбогдуулан цахилгааны ачаалал нэмэгдсэн ч ажилчдаа зөв хуваарилж, ачааллыг тэнцвэржүүлж ажилласан билээ. Өдгөө “УБЦС-4” ТӨХК 10 аймгийг цахилгаанаар хангах хэмжээний цахилгаанаар хүч нэмж, ОХУ-аас оргил цагийн үеэр худалдаж авдаг импортын цахилгааны хэрэглээгээ бууруулж чадсан.

Мэргэжлийн хүнээр нь салбарыг удирдуулахад дээрх үр дүнтэй байна гэж иргэд таашааж буй бол салбарынхандаа гологдсон, томилогдсон цагаасаа хойш л хэл ам таталсан хэд хэдэн сайд бий. Үүний тэргүүн эгнээнд БШУ-ны сайд Л.Цэдэвсүрэн багтана. Салбараа мэдэрдэггүй хэмээн багш нар нь албан тушаалаас нь огцруулах гарын үсэг цуглуулах хөдөлгөөн өрнүүлж байсан нь саяхан. Ямартай ч У.Хүрэлсүхийн танхимын ихэнх сайд улирахаар яригдаж буй ч тэдгээрийн тоонд багтаагүйгээс үзэхэд түүнийг сольж магадгүй байна.

Түүнчлэн Уул уурхай, хүнд үйлдвэрийн сайд Г.Ёндон хоёр хүүхдийнхээ сургалтын төлбөрийг улсын мөнгөөр буюу “Монголросцветмет” ТӨҮГ-аар төлүүлсэн гэх баримт дэлгэгдэж, нэг хэсэг шуугьсан ч “ковид”-ын эрчимд дарагдаад өнгөрөв. Түүний араас урлаг соёлыг гудамжинд гаргасан. Түүгээр ч барахгүй Монголын түүхийг гадаад улсад худалдсан асуудалд холбогдож, У.Хүрэлсүхийн танхимд муу ажилласан сайдын нэгээр тодроод буй Соёлын сайд С.Чулуун орно. Зарим судлаачид түүнийг соёлын үнэт өв, баримтыг гадаад улсад худалдаж, түүхээ утсгасан хэмээн баримт нотолгоотой мэдээлж буй ч энэ талаар тэрбээр үг цухуйлгаагүй нь анхаарал татаж буй.

У.Хүрэлсүхийн танхимын сайд нараас Т.Мөнхсайхан, А.Ариунзаяа, Н.Тавинбэх нар иргэд ам сайтай байгаа бол тааруу буюу муу гэсэн үнэлгээтэй Л.Цэдэвсүрэн, Г.Ёндон, С.Чулуун нар байна. Магад өмнөх сайд нар улирч, албан үүргээ үргэлжлүүлэхэд иргэдийн ийн санал шүүмжлэл нөлөөлөх нь дамжиггүй биз ээ. 

Б.Лхам