УИХ-ын гишүүн С.Ганбаатар өчигдөр "Оюутолгой"-н гэрээтэй холбоотой асуудлаар Төв талбай дээр эсэргүүцэл илэрхийлэн, өлсгөлөн зарласан. Шалтгаан нь тус гэрээг яаралтай засаж, сайжруулах шаардлагатай гэж үзэж буй бөгөөд тэрбээр өмнө нь хэд хэдэн удаа МАН-ыг Рио-Тинтогийн барьцаанд орсон талаар тэмдэглэж байсан.

Оюутолгой төслийг зогсоох гэж буй талаар өнгөрсөн хугацаанд гаднын хэвлэлээр цацагдаж ихээхэн шуугиан дэгдээж байсан ч ЗГХЭГ-ын тэргүүн дэд дарга Б.Солонгоо Засгийн газар уг төслийг зогсоох хэмжээнд хүрэхгүй байх гэж найдаж буй талаар онцлоод, харин хэлэлцээрийг Монголын талд ашигтай байхаар засаж сайжруулах шаардлагатай ярьсан нь бий.  Урьдчилсан байдлаар далд уурхай ашиглалтад ороод 2051 он хүртэл Монгол Улс ногдол ашиг авахгүй. Дээр нь 22 тэрбум ам.долларын өртэй үлдэх тооцоог Рио Тинто компани Засгийн газарт ирүүлээд буй.

Энэ л асуудал Ерөнхийлөгчийн сонгуулийн өмнө түүний барьж авсан гол өнцөг. Нэг хэсэгтээ л мөнхийн сэдэв байх нь. Тэмцлээ ч эхлүүлсэн. Гэвч улстөрийн зорилгоор эхэлсэн түүний энэ тэмцэл  “халдвар” тархах эрсдэл үүссэн гэх нэрийн дор явцгүй болсныг эс тооцвол шүү дээ.

Тодруулбал, түүний эсэргүүцлийг дэмжсэн зарим улстөрийн хүчнийхэн, иргэд Төв талбай дээр цуглаж, нэгдсэн. Харин цугларсан иргэд дотроос халдвартай хоёр хүн илэрч, тэмцэл биш шинжилгээ авах цэг болж хувирав. Улмаар цагдаагийн байгууллагаас С.Ганбаатар гишүүнийг энэхүү үйл ажиллагаагаа зогсоох тухай албан мэдэгдэл хүргүүлжээ.

Халдварын дэгдэлтийг ашиглаж түүний улс төрийн зорилготой өлсгөлөнг бусниулсан тэр тэмцлийн хэлбэрээ хуурай өлсгөлөн рүү шилжүүлж бүр болохгүй бол өөрийгөө шатааж тэмцэхээ ч илэрхийлээд байна. Унасан хүн ууртай гэдэг дээ. 

А.Сүх