Монгол Улсын Ерөнхийлөгчийн сонгуулийг зургаадугаар сарын 9-ны өдөр явуулахаар товлоод буй. Тиймээс ч УИХ-д суудалтай нам, эвслүүд ерөнхийдөө энэ зүгт анхаарлаа хандуулаад эхэлсэн.

2021 оны Ерөнхийлөгчийн сонгуульд МАН, АН, МАХН, ХҮН-ууд нэр дэвшигчээ сойно. Ялалт байгуулсан эрхэм зургаан жил Ерөнхийлөгчийн албыг хашихаар хуульчлаад байгаа.

Монгол Улсын Ерөнхийлөгчийн сонгуульд нэр дэвшигчдийн талаарх мэдээлэл, таамаг хэдийнэ олон нийтийн дунд хөвөрч эхэлсэн. МАН-аас У.Хүрэлсүх, Сү.Батболд, АН-аас Х.Баттулга, Ц.Оюунгэрэл нарын нэр дээгүүр яригдаж байгаа бол МАХН-аас намын дарга Н.Энхбаярыг өрсөлдөх магадлалтай гэж байв. Гэсэн ч өчигдөр Улсын Дээд шүүхээс түүнийг 2021 оны Ерөнхийлөгчийн сонгуульд нэр дэвших боломжгүй гэж үзэв.

Тэгвэл МАХН-аас хэн Ерөнхийлөгчийн сонгуульд нэр дэвших вэ

МАХН-ын дарга Н.Энхбаяр шүүхийн шийдвэр яаж гарахаас шалтгаалан дараагийн нүүдлээ хэрхэн хийхээ хэдийнэ төлөвлөөд байсан гэх. Тодотговол, тэрбээр Дээд шүүх өөрийг нь Ерөнхийлөгчийн сонгуульд өрсөлдүүлэх боломжгүй гэж үзвэл эхнэр О.Цолмон, дэд дарга С.Ганбаатар нарын аль нэгийг зүтгүүлнэ хэмээн “халааслаад” байжээ.

Харин тэдний чухам хэн нь МАХН-аас Ерөнхийлөгчийн сонгуульд өрсөлдөх бол.  

Дээд шүүхийн шийдвэр гарахтай зэрэгцэн МАХН-ын дэд дарга, УИХ-ын гишүүн С.Ганбаатар “Оюутолгой”-н асуудлыг дахин сөхөж, Төв талбай дээр өлсгөлөн зарлаж, ард түмнээс гарын үсэг цуглуулаад эхэлсэн. Энэ нь мөн л Ерөнхийлөгчийн сонгуультай холбоотой байх магадлалтай юм. Мэдээж “Оюутолгой”-н асуудал том сэдэв. С.Ганбаатар гишүүн ч энэ тал дээр гаршсан гэхэд нэг их хилсдэхгүй биз.

МАХН-ын дарга Н.Энхбаярын эхнэр О.Цолмонгийн хувьд одоогоор ямар нэгэн үйлдэл хийгээгүй байна. Гэсэн ч түүнийг нөхрөөсөө дутахгүй улстөрч болж, боловсорсон гэдгийг хэлэх хүн олон байдаг. Зарим нэг нь МАХН-ын Н.Энхбаярын цаана О.Цолмонгийн найруулга голчилдог гэдгийг ч хэлдэг. Тиймээс ч Н.Энхбаяр энэ удаад эхнэрээ Ерөнхийлөгчийн сонгуульд сойж магадгүй гэлцэж буй биз.

Б.Баатар