УИХ-ын Хүний эрхийн дэд хорооны өнөөдрийн хуралдаанаар Монгол Улсын Засгийн газарт чиглэл өгөх тухай тогтоолын төслийг хэлэлцлээ. Энэ үеэр Онцгой байдлын ерөнхий газрын дарга, бригадын генерал Г.Ариунбуян мэдээлэл өгөв.

Тэрбээр "Засгийн газар, Улсын онцгой комиссоос өнгөрсөн нэг жилийн хугацаанд 119 удаагийн тусгай үүргийн нислэгээр нийт 28359 иргэнээ татан авсан. Өнөөдрийн байдлаар манай улсад нийт коронавирусний халдварын 1659  тохиолдол бүртгэгдсэн. Үүнээс  75 хувийг нь дотоодын халдвар эзэлж байна. Иймд дотоодын халдварын тархалт болон тусгаарлах байрны нөхцөл байдалтай холбоотойгоор гадаадад гацсан иргэдээ татан авах үйл ажиллагааг зохион байгуулж байгаа. Улаанбаатар хотод 39 тусгаарлах байр буюу зочид буудлын үйлчилгээ эрхэлдэг байгууллага байгаа.

Одоогийн байдлаар 31 тусгаарлах байранд дотоодын болон тусгай үүргийн нислэгээр ирсэн иргэдээ тусгаарлаад байгаа бол үлдсэн тусгаарлах байранд 800-1000 хүнийг хүлээн авах боломжтой. Хоёрдугаар сард татан авалтын үйл ажиллагааг эрчимжүүлж долоо хоногт нэг удаа нислэг үйлдэж байхаар төлөвлөсөн.

Гол бэрхшээл тусгаарлах байртай холбоотой байдаг. Өвлийн улиралд зөвхөн зочид буудлыг л ашиглах боломжтой. Гэвч эрүүл ахуй, халдвар хамгаалал, хоол үйлдвэрлэл, харуул хамгаалалт зэрэг олон шаардлага хангахгүй байгаагаас халдвар алдах эрсдэл өндөр байна. Тусгаарлах байрны нэг өдрийн зардал нь 50 мянган төгрөг. Үүнээс өндөр бол иргэдэд санхүүгийн хүндрэл учруулдаг" болохыг мэдээлэв.

Р.Алтан