Сэтгүүлзүйн дээд шагнал “Балдорж шагнал”-ыг Г.Отгонбаяр хүртлээ. Монголын сэтгүүлзүйн салбарын манлайлагчийг өчигдөр эргэн дурсаж, түүний нэрээр нэрлэгдсэн “Балдорж шагнал”-ыг гардуулах ёслол болсон юм. Эл ёслолын ажиллагаанд Монгол Улсын Ерөнхийлөгч Ц.Элбэгдорж тэргүүтэй улс төрийн хүрээнийхэн болон соёл урлагийнхан хүрэлцэн ирсэн. Дөрөв дэх удаагаа зохион байгуулагдаж буй энэхүү нэр хүндтэй шагналын энэ жилийн тэргүүн байрыг “Энэ сонгуулийн ялагч нь Н.Энхбаяр” нийтлэлээрээ “Үндэсний шуудан” сонины орлогч эрхлэгч Г.Отгонбаяр шалгарч, шагналыг хүртсэн юм. Харин дэд байрт МҮОНТВ-ийн сэтгүүлч Д.Бямбацэцэг “Тоосгоны цаадах тортогт амьдрал” теле нийтлэлээрээ хүртсэн. Тэрбээр “Балдорж шагнал”-ын дэд байрыг ийнхүү хоёр дахь удаагаа хүртлээ. Монголын үе үеийн сэтгүүлчид хуран цуглаж, мэргэжлийн бүтээлдээ жинхэнэ мэргэжлийн дүн тавиулдаг уг шагналын анхны шилдгээр “Үндэсний шуудан” сонины тоймч, нэрт сэтгүүлч Б.Ганчимэг тодорч байсан бол дараа жил нь   “Өнөөдөр” сонины сэтгүүлч Д.Оюун-Эрдэнэ “Балдорж” шагналын эзэн болж байсан юм. Харин өнгөрсөн жил  сэтгүүлчдийн чанар чансааг мэргэжлийн хүрээнд тодорхойлдог энэ нэр хүндтэй шагналын эзнээр “Өдрийн сонин”-ы Ерөнхий эрхлэгчийн зөвлөх, Монголын нэрт нийтлэлчдийн нэг Жамбалын Гангаа тодорч байсан билээ.