УИХ-ын эмэгтэй гишүүд амь орлоо. Тэд шинэ Засгийн газрыг бүрдүүлэхдээ эмэгтэйчүүдийн тэгш оролцоог ижил түвшинд хангасан байх ёстой. Тиймээс эмэгтэй гишүүдээс Засгийн газарт оруулж өгөөч гэх хүсэлтийг МАН-ын дарга У.Хүрэлсүхэд албан бичгээр өгснөө өнөөдөр мэдэгдлээ. МАН-ын эмэгтэй 11 гишүүн гарын үсгээ зуржээ. Хамгийн ичгэвтэр нь, тэд 10 настай охин харамсалтайгаар амьсгал хураахад дуугүй байлаа. Баянзүрхийн 22-ын товчоонд эмнэлгийн тусламж авч чадалгүй бүтэн шөнийг өнгөрөөж, хүнд сурталтай албан тушаалтнуудын буруугаас амиа алдсан эхийн талаар ганц үг ганхийгээгүй.

Төрөөд удаагүй эхийг нярайн хамт өвлийн дүн хүйтэнд эмнэлгээс авч гарч, хүйтэн автомашинд суулган, ХӨСҮТ-ийн гадаах дөрвөн давхрын шатаар хүүхдийг нь тэврүүлэн өгсүүлсэн байхад ч өмөлзөж ганц ч үг дуугараагүй. УИХ-ын чуулганы хуралдаанд ганц, нэг эмэгтэй гишүүн энэ талаар хөндсөнийг эс тооцвол шүү дээ.

Гэтэл сандал суудал, эрх мэдэл, албан тушаалын төлөө бөөнөөрөө гарч ирчихээд эмэгтэйчүүдийн тэгш эрх ярьж, даналзаж зогсоог хэрхэн ойлгох вэ. УИХ-д эх хүний, эмэгтэй хүний дуу хоолой хэрэгтэй. Ядаж л нинжин сэтгэл, мяндсан ухаанаараа асуудлыг зөөллөж, өөрөөр хандана хэмээж байсан нь саяхан. Тэгээд ч МАН эмэгтэйчүүддээ илүү боломж олгохын тулд тодорхой квот тогтоож өгснөө хэлж байлаа. Гэтэл байгаа царай нь энэ. Нөгөө “Төрийн хатан эрдэнэ” болох Д.Сарангэрэл гишүүн маань дунд нь цохиж явна. Эмэгтэй гишүүдийн жинхэнэ, үнэн нүүр царай энэ аж.    

У.Тэргэл