Төв талбайд Оюутолгойтой холбоотой асуудлаар өлсгөлөн зарлаад  хоёр дахь хоногтоо байсан УИХ-ын гишүүн С.Ганбаатарыг өчигдөр оройн 22 цагийн орчимд цагдаа нар хүч хэрэглэн авч явжээ.

С.Ганбаатарыг дэмжигчид майханг буулгах гэсэн цагдаа нарын өөдөөс эсэргүүцэл үзүүлж, тэдний дунд багахан мөргөлдөөн үүссэн байна.

Энэ бүхний эцэст цагдаа нар С.Ганбаатарыг албадан Сүхбаатар дүүргийн эрүүл мэндийн төв рүү авч явж, эрүүл мэндийн үзлэгт албадан оруулсан байна.  Түүнд хийсэн эрүүл мэндийн үзлэгийн дүгнэлтийг танилцуулъя.

“Өлсгөлөн зарлагч С.Ганбаатарын (Улсын их хурлын гишүүн) үзлэг, шинжилгээ, оношилгоонд илэрсэн өөрчлөлтүүд нь зүрхний шигдээс, аминд аюултай хэм алдагдал, тархины харвалт, захын судасны хүндрэлүүд гарах өндөр эрсдэлтэй.

Мөн олон улсын хэмжээнд мөрддөг эрт сэрэмжлүүлэх үнэлэмжийн үнэлгээгээр биеийн дулааны хэм, артерийн даралт, буурсан дөрвөн онооны эмнэл зүйн шинж тэмдэг илэрсэн тул өлсгөлөнг зогсоож, яаралтай эмнэлэгт хэвтүүлэн эмчилгээ хийх зайлшгүй шаардлагатай байна. Итгэмжлэгдсэн эмч Р.Нарантуяа, Поликлиникийн эрхлэгч Т.Ундрах” гэжээ. 

У.Тэргэл