УИХ-ын гишүүн С.Одонтуяа: “Өмнөх Засгийн газар хуурах бас дахин хуурах гэдэг стратеги барьж ажилласаар байгаад эдийн засгийг хүнд байдалд оруулсан. Тэгээд өчүүхэн шалтаг олоод зугтсан. Та үргэлжлүүлэн хуурах уу. Ковидын эсрэг эдийн засгийн тодорхой төлөвлөгөө байна уу.  Алсын хараа 2050 гэж бүгд бахархан ярьж байна. Гэтэл иргэд тэтгэвэр, цалин тавих уу гэж асууж байна. Татвар, шимтгэлийн орлого бүрдэхгүй нь тодорхой болчихлоо. Төрийн албан хаагчдын цалин, тэтгэвэр, тэтгэмжийг ямар эх үүсвэрээр тавихаа тодорхой хэлээч. Төсөв батлахад би тодорхой хэлж байсан.  Бид маш их өр тавьсан гэсэн.  Дэлхийн банк энэ тухай дэлхийгээр нэг зарлаж, шившиг болгож байна. Энэ өрийг дарах ямар стратеги, төлөвлөгөө байна вэ. Цар тахлын үед  гадаадад маш олон хүн амиа алдсан, хоол хүнсгүй болсон,  эх орондоо гомдсон. Энэ асуудалд бодитой ямар ажил хийх вэ. Монголын  дарга нар өөрсдөдөө мөнгө харамладаггүй. Гадаадад байгаа иргэдээсээ харамлаж байна. Төгсгөлд нь,  ард иргэдтэйгээ хамгийн хүнд үед хамт байж, зовлон  жаргалаа хуваалцаж, эцсээ хүртэл явсан удирдагч түүхэнд үлддэг.  Танд бүх эрх мэдэл байна. Танд ажиллах бололцоо байна. Бид дэмжихээ дэмжинэ, дэмжихгүйгээ сөрөг хүчний үүргээ биелүүлээд явна. 

Л.Оюун-Эрдэнэ сайд: Би байгаагаараа л байдаг гэдгийг хамгийн сайн мэдэх нь та байх. Сөрөг хүчнийхээ хувьд хэлж байгаа байх. Та миний залуу нас, хүүхэд насыг сайн мэдэх хүн. Нээлттэй байж, чадахаа, чадахгүйгээ хэлээд хамтарч ажиллаад урагшилна. Мэдээж өртэй холбоотой асуудал байгаа. Засгийн газар 8 сая ам.доллар,  Төвбанк 2.1 сая ам доллар, бусад өр 8 сая ам.доллар гээд байгаа. Бүгд өр биш, хөрөнгө оруулалт хийгээд яваа төслүүд ч бий. Иргэдэд хувийн  секторын, улсын өрийг хольж, буруу мэдээлэл өгмөөргүй байна. Улсын төсөв хүндрэлтэй байгаа. Гэхдээ бид цар тахлын дараах эдийн засгийн төлөвлөгөөг авч хэрэгжүүлэх зайлшгүй шаардлага бий гэж үзэж байгаа. Цалин, тэтгэвэр, тэтгэмжээ тавьж чадахгүй  хэмжээнд Монгол Улс очихгүй гэж итгэж байгаа. Дандаа хэцүү зүйлийг ярьж болохгүй. Цар тахлын дараах нөхцөл байдал муу биш байх дүр зураг дэлхийд харагдаж байгаа. Огцом зогсолт хийсэн шигээ огцом сэргэх болов уу гэсэн найдлага бий. Бид харин одооноос тусгай төлөвлөгөө гарган бэлдэж, зөв ашиглахад анхаарах ёстой. Гадаадад байгаа монголчуудтайгаа холбоотой асуудалд та бид хоёр төстэй байр суурьтай байгаа. Уулзаад ямар дэс дараалалтай авчрахыг судалж, хамтран ажиллана. Эндэх нөхцөл байдалтайгаа уялдуулахгүй  бол  эмнэлэг болоод бусад салбарт эрсдэл үүсч болзошгүйг мэргэжлийн байгууллагууд анхааруулж байгаа” гэв.  

У.Тэргэл