УИХ-ын чуулганы хуралдаанаар Монгол Улсын Ерөнхий сайдыг томилох асуудлыг хэлэлцэж байгаа. Энэ үеэр Л.Оюун-Эрдэнэ цар тахлын дараа хоёр яам шинээр байгуулна гэдгээ мэдэгдэв.

Тэрбээр энэ талаар "Цар тахлын үед Засгийн газрын бүтцэд өөрчлөлт хийхгүй байх нь зүйтэй гэж үзэж байгаа. Гэхдээ цар тахлын дараа хоёр яам шинээр байгуулна. Цар тахлын дараа Эдийн засаг хөгжлийн яам, Цахим хөгжлийн яам байгуулна. Эдийн засаг, хөгжлийн яам томоохон төсөл, гадаадын хөрөнгө оруулалттай холбоотой ажлууд, эдийн засгийн харилцааг авч явах бодлогын яам байна. Цахим хөгжлийн яамыг байгуулснаар төрийн албаны данхар бүтцийг 30-35 хувиар цомхтгох боломж бүрдэнэ. Их хэмжээний цаасыг хэмнэнэ. Цахимд төрийн бүх үйлчилгээг төвлөрүүлэх зорилт тавина. Урьдчилан тооцоолж байгаагаар хоёр яам байгуулах асуудлыг намрын чуулганаар хэлэлцүүлнэ" гэлээ.