Ерөнхий сайд асан У.Хүрэлсүх 32 дахь Ерөнхий сайд Л.Оюун-Эрдэнэд тамгыг нь гардуулан өглөө. 

Энэ үеэр Ерөнхий сайд У.Хүрэлсүх "Би таван жил Монгол Улсын Ерөнхий сайдаар ажилласан. Үүний гурван жилд та миний Хэрэг эрхлэх газрын даргаар, энэ улс орныхоо төлөө хоёргүй сэтгэлээр зүтгэсэнд баяртай байна. Та 41 настай идэр залуу. Монгол төрийн хүнд ачаа таны нуруун дээр бууж байна. Таныг улс орондоо ихийг хийж бүтээх, эх орноо гэсэн сэтгэлтэй, зүтгэлтэй, шударга хүн гэж бодож явдаг. Хүүхэд байх цагаасаа Монголын залуучуудын, нам, төрийн байгууллагад ажиллаж бэлтгэгдсэн, туршлагатай, Монголын залуу улс төрч, удирдагч болж байна. Түүхэн эгзэгтэй цаг үед улс орноо зөв удирдан, ард түмнийхээ эв нэгдлийг сахин хамгаалж, хоёргүй сэтгэлээр зүтгэнэ гэдэгт огт эргэлзэхгүй байна. Эрхэм хүндэт Монгол Улсын Ерөнхий сайд танд Засгийн газрын тамгыг гардуулж өгье" гэлээ. 

Харин шинэ Ерөнхий сайд Л.Оюун-Эрдэнэ "Эрхэм хүндэт Монгол Улсын 31 дэх Ерөнхий сайд танд цаашдын аж амьдрал, улс төрийн карьерт нь өндөр амжилт хүсье. У.Хүрэлсүх таны тэргүүлж байсан Засгийн газрын бодлогыг үргэлжлүүлж, эхлүүлсэн томоохон бүтээн байгуулалтуудыг дуусгаж, шударга тэмцлийг үргэлжлүүлж, энэхүү том хөгжлийн бамбарыг түүчээлэн Монгол Улсын хөгжил дэвшилд түүхэн хариуцлагыг хүлээх болно. Тантай нэг танхимд ажиллах нь миний хувьд нэр төрийн хэрэг байсан. Олон зүйлийг сурсан. Амаргүй сэтгэл зүй байгаа ч хичээнгүйлэн ажиллах чин хүсэл, Монгол Улсаа өөрчлөх, олон ажил байна" хэмээлээ.