Монгол Улсын Ерөнхийлөгч асан Н.Багабандийг төрд гай ч болоогүй, гавьяа ч байгуулаагүй эрхэм гэдэг. Төрийн тэргүүний албыг хашиж байхдаа ч төвийг сахиж, бууснаасаа хойш ч титэм үг тэрлэхээс өөрөөр нам гүмхэн амьдарч ирсэн.

Харин тэрбээр 2016 онд Оюутолгой компанийн Монголын талын Төлөөлөн удирдах зөвлөлийн гишүүнээр  сонгогдсоноосоо хойш элдэв муу нэрийг зүүх болсон юм. Зөөлөн сэнтий, өндөр цалин хангамж түүнийг соронзон мэт татсан бололтой. Оюутолгойн ТУЗ-д Монголын талыг төлөөлж гурван эрхэм ажилладаг гэхээс өөрөөр мэдээлэлгүй, ямар үүрэг харуцлага хүлээдэг талаарх ч ойлголтгүй байсан ард иргэд, төрийн түшээдийн дийлэнх нь Оюутолгойд ээлтэй байсныг хэлэх үү, ямар ажил хийсэн талаарх тайлан мэдээлэл ч нэхдэггүй нь Н.Багабанди эрхмийн хувьд таатай үе энэ байв.

Харин 2020 онд Оюутолгой компанийн ТУЗ-ийн Монголын талын гурван гишүүний сонгон шалгаруулалтыг зарлаж, босгыг нь өндөрсгөж  шинээр томилох болоход  Н.Багабандийн жинхэнэ нүүр царай илэрч, тэрбээр ЗГХЭГ-ын дарга асан, одоогийн Ерөнхий сайд Л.Оюун-Эрдэнэ рүү өдөр шөнөгүй мессеж илгээн элдвээр дарамталж, үүдийг нь сахиж байгаад  үлдэж чадсан гэдэг.

Гэвч өдгөө энэ нь хурц шүүмжлэлийн “бай” болоод байна. Ялангуяа УИХ-ын чуулганаар Л.Оюун-Эрдэнийн нэрийг Ерөнхий сайдад хэлэлцэх үеэр Т.Аюурсайхан гишүүн “Оюутолгойн гэрээ улс ард түмэнд ийм хохирол учруулаад байхад ард түмнийхээ төрийн тэргүүнээр ажиллаж байсан хүн нь Оюутолгойгоос ашиг, орлого олоод яваад байж таарахгүй. Нэг бус удаа шаардлага тавьж байгаа. Н.Багабанди гуайг Оюутолгойн ТУЗ-өөс нэн даруй гаргах ёстой.  Энэ олон жил ашиг хүртээд чимээгүй суусан. ЗГХЭГ-ын даргыг дарамтлаад үлдсэн гэсэн. Харин одоо Улсын Ерөнхий сайдыг арай дарамтлахгүй байлгүй дээ” гэсэн юм.

Монгол Улсын Ерөнхий сайдад нэр дэвшигч Л.Оюун-Эрдэнэ: Манай Засгийн газарт ажиллаж байгаа хүмүүс буцаад Оюутолгой  компанид очоод ажиллачихдаг. Үүнийг ч гэсэн цаашид бодох ёстой. Хамгийн их мэдээлэлтэй хүмүүс төрд ажиллачихаад одоо тэнд очоод  төрийн бүх мэдээллийг өгөөд явж байгаа. Үүнтэй холбоотой олон асуудал байна. Тийм учраас Оюутолгойн ТУЗ-ийн гишүүдийг бүтэн цаг ажилладаг болгосон. Цаашлаад ТУЗ-ийн нэг гишүүнийг солино” гэсэн юм.

Харин энэ нь экс Ерөнхийлөгч Н.Багабанди юм. Монголын талыг төлөөлөх нь бүү төрийн бүх мэдээллийг өгч, дамжуулчихаад сууж байдаг  гэх хардлага ч шууд түүн рүү чиглэж байна. Мөн зарим гишүүн албан тушаалаас нь буулгаад зүгээр орхих ёсгүй. Эл үйлдлийнх нь төлөө эрүүгийн хариуцлагыг ярих ёстой гэсэн байр сууриа илэрхийлээд эхэлжээ.

У.Тэргэл