Монгол Улсын Засгийн газар УИХ-ын гишүүн Сү.Батболдыг их хэмжээний авлига, хууль бус хөрөнгө нуун дарагдуулсан хэргээр Нью-Йоркийн шүүхэд өгсөн тухай мэдээлэл “Global anti Corruption” вэб сайтад гарсан билээ. Энэхүү дуулиан дэгдэх зуурт Монголын Засгийн газар нэхэмжлэлээ буцаан татлаа гэх мэдээлэл гарч, энэ нь улстөрчдийн хэрүүлийн сэдэв болоод байна. Учир нь, Монгол Улсын Ерөнхий сайд У.Хүрэлсүх албан тушаалаасаа сайн дураар чөлөөлөгдөх өргөдлөө өгөхийн өмнөх өдөр нэхэмжлэлийг татсан байсан юм. Тиймээс төлөвлөсөн тавилттай жүжиг байж, урьдаас тооцжээ зэргээр дайралтууд эхэлсэн билээ.

БАРИМТ 1

УИХ-ын гишүүн Т.Аюурсайхан харин энэхүү маргааныг хагалав. Тэрбээр “Гаднын шүүхэд хэсэг бүлэг этгээд Засгийн газрын нэрийг барьж, гар хөлөө оролцуулан нэхэмжлэлийг татсан бол хуулийн хариуцлага ярих ёстой. Ерөнхий сайдын байр суурь үүнд хатуу байгаа. Даруйхан тодруулж, нэхэмжлэлийг Монгол Улсын нэрийн өмнөөс өнөөдөртөө (нэгдүгээр сарын 28) багтаан гаргана. Энэ үйл ажиллагааг доголдуулсан, захиалагч болон гүйцэтгэгч этгээдүүдийг тогтооно. Бид хайцаалахгүй. Үүний цаана том асуудал ил болж байгаа” гэв.

Үүнээс харахад, ямарваа нэгэн бүлэг этгээд, бүлэглэл Засгийн газрын нэрийг барьж, Нью-Йоркийн шүүхээс нэхэмжлэлийг татсаныг түвэггүй ойлгож болно. Хэн захиалж, хэн гүйцэтгэсэн болоод бүхэл бүтэн Засгийн газрын нэрийг барьж, улс дамжин ажиллагааг зохион байгуулсан байж таарах вэ.  

БАРИМТ 2

Монгол Улсын Ерөнхийлөгч чуулганы индэр дээрээс "Тусгаар Монгол Улсыг эзэгнэн дарлах гэсэн тодорхой бүлэглэл, бүр тодорхой хэлэх юм бол УИХ-ын гишүүн, Ерөнхий сайд байсан Сүхбаатарын Батболдын удирдсан бүлэглэл төрийн эргэлт хийж байна" хэмээн мэдэгдсэн юм. Харин УИХ-ын гишүүн Сү.Батболд "Надад үг хэлэх боломж олдлоо. Сая Ерөнхийлөгч Их хурлын индэр дээрээс Оюутолгойтой холбож, намайг гүтгэлээ. Манай Засгийн газар Оюутолгойн гэрээг сайжруулах хоёр зүйл хийсэн. Зээлийн хүүг бууруулах хувь нийлүүлэгчдийг гэрээнд тусгасан. Давхар татварын гэрээг 0 хувь байсныг 20 хувь болгосон. Жинхэнэ утгаар нь Монгол Улсын эрх ашгийг сайжруулсан. Монголын төр нээлттэй, хариуцлагатай, нэгнээ хардаж, шалгах эрхтэй. Томоохон төслүүдээ шалгуулж, ард иргэдэд нээлттэй мэдээлэл өгч, төрийн нэр хүндээ олох ёстой. Нүгэлтэй хүн нүглээ үүрэх цаг ирнэ. Намайг Оюутолгойтой холбож, гаднын хувийн бизнесмэнүүдтэй хардаж, гаднын хувийн байгууллагаар ийм зүйл хийлгэчихээд шүүхэд өгч байгаа. Хэрэгтэйгээ танилцах эрхийг маань нууц гэж  хаачихаад  гаднын хэвлэлээр цацах бохир технологи явуулж байгаа. Эзэн нь ч тодорхой" гэв.

БАРИМТ 3

Монгол Улсын Засгийн газрын нэрийг барьж, Нью-Йоркийн шүүхээс нэхэмжлэлийг татах захиалга өгсөн гүйцэтгэсэн этгээдүүд хэн бэ. Хөрөнгө мөнгө, эрх мэдэлтэй, улс орон дамжсан сүлжээтэй эрхмүүд л үүнийг хийж чадна.

Мэдээж, эн тэргүүнд Ерөнхийлөгчийн дурдсанчлан, Сү.Батболдын бүлэглэл орж байна. Хардах л субъект. Эсрэгээрээ Ерөнхий сайд асан Сү.Батболдын хэлсэнчлэн, Монгол Улсын Ерөнхийлөгчийн явуулга ч байж болох. Аль нь ч байсан Монгол Улсын Ерөнхий сайд Л.Оюун-Эрдэнэ захиалагч, гүйцэтгэгчийг олж, хариуцлага тооцно. Ухарч няцахгүйгээр энэ байр суурин дээрээ хатуу зогсоно гэдгээ мэдэгдчихсэн.

Хамгийн гол нь Засгийн газар Нью-Йоркийн шүүхэд  гаргасан нэхэмжлэлээ сэргээсэн бол Ерөнхий сайд асан, УИХ-ын гишүүн Сү.Батболд улс дамнасан энэхүү ажиллагааг хэн санхүүжүүлж, зохион байгуулсныг олж тогтоох ёстой. Миний нэр төрд халдан, үүндээ Засгийн газрыг татан оролцуулж буй хүмүүсийг олж хариуцлага тооцох учиртай гээд шүүхэд хандаж байгаагаа өчигдөр орой мэдэгдсэн билээ. Түүний мэдэгдлийг ямар ч хачиргүйгээр бүрэн эхээр нь хүргэе.

Мэдэгдэл,

“УИХ-ын гишүүн С.Батболд намайг төрийн эргэлт хийсэн, Оюутолгойн гэрээг байгуулахад авилга авсан нь тогтоогдсон мэтээр Ерөнхийлөгч Х.Баттулга УИХ-ын индэр дээрээс мэдэгдсэн бол сүүлийн хэдэн хоног энэ асуудалтай холбогдуулан Монгол Улсын Засгийн газар намайг Нью Йорк хотын шүүхэд өгсөн боловч улс төрийн шахалт дарамтын улмаас нэхэмжлэлээсээ татгалзсан, тэр байтугай Ерөнхий сайд У.Хүрэлсүх энэ асуудлаас болж огцорсон мэтээр ор үндэслэлгүй гүтгэлэг тараагдаж байна.

Засгийн газрын аливаа нэгэн байгууллага Нью-Йоркийн болон гадаадын өөр улсад ийм нэхэмжлэл надтай холбогдуулан гаргаагүй, гаргаагүй учраас татаж аваагүй гэдгээ Засгийн газрын эх сурвалжууд удаа дараа мэдэгдсээр ирлээ.

АНУ-ын хуулийн компани нь Засгийн газрын байгууллагын нэрийг хуурамчаар ашиглан Солонгосын иргэдийн надад хамааралгүй өмчийг царцаах хүсэлтийг Нью-Йоркийн шүүхэд гаргаж, шүүхээс царцаахгүй гэсэн урьдчилсан шийдвэр гаргасны дараа 2020 оны арванхоёрдугаар сарын 9-нд буюу Засгийн газар огцрохоос бүтэн нэг сарын өмнө миний эсрэг нэхэмжлэлээ өөрсдөө зогсоосон гэдэг нь Нью Йоркийн шүүхийн вебсайт дээр олон нийтэд ил тод байгаа. Сүүлдээ 2021 оны нэгдүгээр сарын 19-ний өдөр нэр дурдсан Солонгосын иргэдийн эсрэг гаргасан нэхэмжлэлээ хүртэл АНУ-ын хуулийн компани өөрөө зогсоосон байгаа нь шүүхийн баримтаас тодорхой байна. Харин энэ компани хэний даалгавраар анх нэхэмжлэл гаргаж, цаг хугацааны хувьд ийм нарийн зохион байгуулалттайгаар татан авсныг шалгаж тогтоох ёстой бөгөөд энэ бүх үйлдлийг хэн хаанаас удирдан санхүүжүүлж байгааг ч шалгуулж, үнэн зөвийг тогтоох ёстой.

Засгийн газарт огт хамаагүй энэ үйлдлийг Монгол Улсын Засгийн газарт хамаатуулж, миний нэрийг хутгаж, тэр байтугай Засгийн газрын огцрох үндэслэл болсон мэтээр гүтгэлэг зохион байгуулж байгаа нь анхнаасаа энэ бүх зүйл нь улс төрийн зорилготой дайралт байсан гэдгийн нотолгоо юм” гэжээ.  

У.Тэргэл