Төв талбайд өлсгөлөн зарлаж буй УИХ-ын гишүүн С.Ганбаатар өөрийн цахим хуудастаа  “Өглөөний эмчийн үзлэгээ үзүүлчихлээ. Бие маань их сайн байна. Тав дахь өдрөө өлсгөлөнгөө (97 цаг) үргэлжлүүлж байна. Одоо 09.00 цагаас Ерөнхий сайд Нью-Йоркийн Дээд шүүхэд албан ёсоор нэхэмжлэхээ гаргаж, гарын үсэг зурж явуулах ёстой. Албан бичгийг явуулах хүртэл өлсгөлөнгөө зогсоохгүй үргэлжлүүлэх болно” гэжээ.

Өчигдөр буюу нэгдүгээр сарын 28-ны оройн 21 цагийн алдад УИХ-ын гишүүн Х.Нямбаатар өлсгөлөн зарлаж буй С.Ганбаатар дээр очиж “Яг одоо хэлэлцээрийн ширээний ард сууя. АНУ-ын цагаар өнөөдөртөө багтаая, Ерөнхий сайд гарын үсэг зурахаар хүлээж байна” гэсээр Төрийн ордон руу авч орсон аж. Ингээд бичигт,

-Авлига авсныг тогтоолгохоор Нью-Йоркийн шүүхэд хандах,

-Шүүх хурал болохын өмнө “Бид эвлэрчихлээ” гэж явуулсан эзэн биегүй бичгийг цуцлуулах,

-Хуучин нэхэмжлэлээ яг тэр хэвээр нь сэргээх гэсэн гурван асуудлыг тусгасан аж. Бичгээ төлөвлөөд гарын үсэг зуруулах болоход Ерөнхий сайд, Х.Нямбаатар хоёр алга байжээ. Энэ талаар С.Ганбаатар гишүүн “Маргааш өглөө гарын үсэг зурахаар боллоо. Яг шийдвэрлэх мөчид хэлснээсээ буцан хуйвалдсан юм шиг хоёулаа зугтаах нь эргэлзээ төрүүлж эхэллээ” хэмээсэн байлаа.

У.Тэргэл