Ерөнхий сайд Л.Оюун-Эрдэнийн тэргүүлсэн Засгийн газарт орж ажиллах сайд нарын нэрс эхнээсээ тодорч эхэллээ. Яг одоо МАН-ын Удирдах зөвлөл хуралдаж байгаа ба сайдад нэр дэвшигчдийг хэлэлцэн шийдвэрлэж байгаа аж. Монгол Улсын Ерөнхийлөгч өөрийн хүнээ сайдад улираах шахалт үзүүлж буй тухай бид өмнө мэдээлж байсан. Харин энэ тохиролцоондоо хүрсэн бололтой, Ерөнхийлөгчийн санал болгосон Батлан хамгаалахын сайд Г.Сайханбаяр, Зам, тээврийн хөгжлийн сайд Л.Халтар, Уул уурхайн сайд Г.Ёндон нар танхимдаа улиран үлджээ. Харин хамгийн эргэлзээтэй, өрсөлдөөнтэй байгаа нь Шадар сайдын суудал аж. Үүнд, УИХ-ын гишүүн асан Ц.Нямдорж, гишүүн С.Амарсайхан, Ж.Мөнхбат нарын нэрсийг ярьж байгаа бол С.Амарсайхан гишүүний нэр ЗГХЭГ-ын даргад мөн яваа. Тиймээс тэрбээр аль нэг албан тушаалд үлдэх нь тодорхой болчихлоо.

Харин бусад яамны сайд нараас улирч үлдэх нь тодорхойгоор Хууль зүй, дотоод хэргийн сайд Х.Нямбаатар, Хөдөлмөр, нийгмийн хамгааллын сайд А.Ариунзаяа, Барилга, хот байгуулалтын сайд Б.Мөнхбаатар, Хүнс, хөдөө аж ахуй, хөнгөн үйлдвэрийн сайд З.Мэндсайхан, Эрчим хүчний сайд Н.Тавинбэх нар орж байна.

Байгаль орчин, аялал жуулчлалын сайдад одоогоор гаднаас хүн томилох тухай ярьж байгаа бол Гадаад харилцааны сайдад УИХ-ын гишүүн Х.Булгантуяа, Ц.Мөнх-Оргил нарын нэр яваа аж. Цаашлаад Сангийн сайдад УИХ-ын гишүүн Б.Жавхланг томилох нь тодорхой болж, харин Боловсрол, шинжлэх ухааны сайдад тус яамны дэд сайд Г.Ганбаяр, УУХҮ-ийн дэд сайд О.Батнайрамдал, УИХ-ын гишүүн Л.Энх-амгалан нарын нэрс дуулдаж байна.

Ихээхэн хэл амтайгаар суудлаасаа буусан Соёлын сайдад “Мөнхийн үсэг”-ийн Б.Батцэцэг, Монгол телевизийн захирал Ч.Номингийн нэр дуулдаж байгаа нь ихээхэн сонирхол татаж байгаа юм. Мөн сайдаа авч үлдэх гэж хичээсэн эрүүл мэндийн салбарынхны хүсэл биелэх эсэх нь одоогоор тодорхойгүй байна. Учир нь, энэ яаманд Эрүүл мэндийн сайд Т.Мөнхсайханаас гадна гаднаас Т.Болормаа гэгч эрхмийг томилох санал орж иржээ. Тэрбээр УИХ-ын гишүүн, Гадаад харилцааны сайд асан Д.Цогтбаатарын гэргий юм байна.

УИХ-ын ээлжит өнөөдрийн чуулганаар Засгийн газрын сайд нарыг хэлэлцэн, эцэслэн баталж, тэд тангаргаа өргөснөөр Ерөнхий сайдын шинэ танхим бүрдэнэ. Мөн намрын ээлжит чуулган хаалтаа хийх юм.