А.Ариунзаяа сайдыг цахим сүлжээнд бус амьдралд ойр, хөрсөн дээр бууж ажиллахыг шаардав

Монгол Улсын 32 дахь Ерөнхий сайд Л.Оюун-Эрдэнийн Засгийн газар өчигдөр бүрэлдсэн. Шинэ Засгийн газарт С.Амарсайхан, Ц.Нямдорж, Б.Батцэцэг, Б.Жавхлан, Л.Энх-Амгалан, С.Энхболд, Н.Уртнасан, Ч.Номин нарын найман хүнийг танхимын гаднаас шинээр орж ирсэн бол үлдсэн сайд нар нь улирч ажиллахаар болсон юм. 

Сайд нарыг томилох чуулганы хуралдааны үеэр гишүүд шинээр томилогдож байгаа сайд нар зөвлөгөө өгч, хэрхэн ажиллахыг нь тодруулж байсан бол улирч буй сайд нарт хатуу уг дайж байв. Тухайлбал, Нийгмийн хамгаалал, хөдөлмөрийн сайд А.Ариунзаяа нэлээд хатуу үгний бай болсон. Түүнийг гишүүд ажлаа цахим сүлжээнд бус амьдралд ойр, хөрсөн дээр бууж ажиллахыг шаардаж, тэр ч бүү хэл ажлаа хийж чадахгүй бол шаардлага тавьж, хариуцлага тооцох асуудлыг хөндөх болно гэдгээ илэрхийлж байсан юм. Тухайлбал, 

УИХ-ын гишүүн С.Чинзориг: Л.Оюун-Эрдэнэ сайдын Засгийн газар маш амаргүй цаг үед ажиллахаар боллоо. Нэг төрийн албан хаагч хариуцлага алдвал Засгийн газар бүрэн бүрэлдэхүүнээрээ огцордог жишиг тогтсон гэж ойлгож ажиллахыг зөвлөж байна. УИХ Засгийн газар хамтарч бие биенийхээ ажлыг ойлгож  ажиллаж чадсангүй юу гэж ойлгож байгаа. Хэрэв тэгэхгүй бол ажил цаашаа явахгүй. Ц.Нямдорж сайд Засгийн газарт орж ажиллаж байгаа нь сайшаалтай. Тэгэхгүй бол төрийн албанд ажиллаж үзээгүй залуу сайд нар хэцүү. Тэдэнд түшиг болох нь.

Мөн БШУ-ын сайд боловсролын салбарт анхаарч оюутан сурагчдын сургалтын төлбөр, цахим хичээл хийх боломж, сургалтын чанар зэрэгт анхаарах хэрэгтэй.

Н.Тавинбэх, Л.Халтар сайд нар Өвөрхангай аймгийн цахилгаан станцыг Улаанбаатар Арвайхээр чиглэлийн замын асуудлыг яаралтай шийдэж өгөхийг хүсч байна. Үүнийг цаашид ч шаардах болно. Мөн мал аж ахуйн бодлогыг шинэчлэх шаардлагатай гэдгийг Мэндсайхан сайдад хашаа хатгавал бууж, хамар хатгавал идэж байдаг бодлогоо шинэчлэх шаардлагатай.

Өнгөрсөн хугацаанд А.Ариунзаяа сайдыг би дэмжиж ажилласан. Нэг ч удаа шүүмжилж, хатуу үг хэлж үзээгүй. Миний оронд очсон залуу хүн ажилдаа сураг, дадлагажиг гэж харсан. Гэтэл тодорхой үр дүн гарахгүй байна. Фэйсбүүкээр ажлаа явуулдаг байдлаа болимоор байна. Морьноосоо бууж, ажилдаа ормоор байна.

Засгийн газрын үйл ажиллагааны хөтөлбөрт тусгасан иргэдээ ажилтай орлоготой болгох асар их ажил байна. 150 мянган ажлын байр бий болгож, ядуурлыг хоёр дахин буулгана гэсэн сонгуулийн мөрийн хөтөлбөрт тусгасан энэ зүйлдээ ормоор байх юм. Зургаан сар ажиглалаа. Тэнд төрийн албан хаагчдыг халж солихоос өөр зүйл хийсэнгүй. Ингэж ажиллавал  хатуу шаардлага тавьж, харицлага тооцох асуудлыг хөндөх болно. Үүнийг анхаараарай.  Ц.Нямдорж сайд ч үүнийг анхаарна биз дээ.

УИХ-ын гишүүн П.Анужин: Шинэ засгийн газрын гишүүд тангараг өргөж байна. Тангараг өргөхийнх нь өмнө, Хөдөлмөр Нийгэм Хамгааллын яамны сайдад нэр дэвшигч А.Ариунзаяа сайдад, таны ярьдаг статистик тоо, ард түмний амьдрал өөр байна, ажилдаа гүн орж ажиллаарай хэмээн хэлсэн. Хэлсэн үг бүрийг сонссон хүн олон биз ээ! Хүн амын 10 хувийг дангаараа эзэлдэг 330 000 хүн амтай Сонгинохайрхан дүүргээс сонгогдсон УИХ-ын гишүүний хувьд энэ зүйлийг хэлж сануулах нь зүйн хэрэг гэж үзнэ! Би ард түмнийхээ дуу хоолой болж, асуудал хүндрэлийг хууль эрх зүйн хувьд шийдэлцэх гэж их хурлын гишүүн болсон! Хүн ардын амин чухал амьжиргаа, эн тэргүүний асуудал бүрийг шийддэг Хөдөлмөр Нийгэм хамгааллын сайд А.Ариунзаяа, дээрх асуудалд эгдүүцэж, асуултыг чинь ойлгосонгүй, яагаад дайраад байна хэмээн уурлан эгдүүцэж, уулгалан загналаа.

Нэгхэн өгүүлбэрийн утга ойлгохгүй, дийлдэшгүй их Эгогоор салбар хэрхэн толгойлох вэ?!! Ард түмний итгэл хүлээн төр түших, арван хүнээр дэмжүүлж сайд болох асар их ялгаатай! Хүн бүхэн боргодог би ч бас гэж андуурав зэ! Миний бие өөрийгөө өмөөрөхгүй! Харин уйлж буй эмэгтэйчүүд, гундаж буй иргэдийнхээ төлөө Өрвөлзөнө! Дуугарна! Үг дааж, үүрэг хүлээж, сошиалаар биш ард түмнийхээ амьдралд ойрхон байж ажилла сайдаа!

Өнөөдрөөрөө бахархах зүйлгүй хүн, өчигдрөөрөө онгирдог гэдэгчлэн, сайн өвөө Жасрайнхаа нэрийг бага барь. Ямба аалийг сурахад оройтохгүй, ял зэмийг гүдэсхэн үүрэхэд тэвчээр хэрэгтэй!

Элдвээрээ дуудуулж, хирийн үг дааж байж төрийн өндөр босго алхдаг! Ард түмэн ажилгүй, айл гэр өлсгөлөн, аав ээж гундуу явна сайдаа! Сайдын улаан хамгаалагч болох гэж төрийн тангараг өргөөгүй ээ!" гэсэн юм. 

Б.Баатар