Ардчилсан намын удирдлагууд хоорондоо толхилцон, тамга тэмдгээ булаацалдан “Би намын дарга” хэмээн зөрчилдсөөр удлаа. Тэдний асуудал Улсын Дээд шүүх хүртэл явж, намынхан нь ч С.Эрдэнэ, Ц.Туваан нарыг даган хоёр хуваагдчихаад байгаа юм. Ардчилсан намын Х Их хурал өнгөрсөн оны арванхоёрдугаар сарын 18,19-нд цахимаар болсныг АН-ын дарга С.Эрдэнэ хууль бус хурал болсон гэж үзэн эсэргүүцэж, намын үндсэн дүрэмд цахимаар хуралдах тухай ямар ч зохицуулалт байхгүй хэмээж байв. Харин Ардчилсан намын даргын үүрэг гүйцэтгэгч Ц.Туваан 2021 оны нэгдүгээр сарын 29-ний өдөр ийм нэгэн тушаал гаргаж, С.Эрдэнийг намынх нь гишүүнчлэлээс хасах тухай шийдвэрийг гаргасан байна Тодруулбал, 

Ардчилсан намын Үндсэн дүрмийн тавдугаар бүлгийн 5.17.1, 5.21.19 дэх заалт, Ардчилсан намын Үндсэн дүрмийн хорооны 2021 оны  нэгдүгээр сарын 08-ны өдрийн “Дүгнэлт гаргах тухай” 02 тоот тогтоолыг тус тус үндэслэн ТУШААХ нь,

Нэг. Ардчилсан намын Үндсэн дүрмийн гуравдугаар бүлгийн 3.9,3.2, 3.9,3.4 дэх  заалтуудыг зөрчсөн Содномзундуйн Эрдэнийг Ардчилсан намын гишүүнээс найман жилийн хугацаатай хассугай.

Хоёр. Энэ тушаалын хэрэгжилтэд хяналт тавьж, ажиллахыг Хэрэг эрхлэх газрын дарга  П.Нүрзэдэд даалгасугай.

Намын даргын үүрэг гүйцэтгэгч Ц.Туваан гэжээ.

Ардчилсан намын гишүүн Үндсэн дүрмийн дээрх  заалтуудыг зөрчсөн болон гэмт хэрэг үйлдэж,  гэм буруутайг нь шүүхээр тогтоосон тохиолдолд намын гишүүнээс хасах асуудлаар ДХХ-ноос ажлын тав хоногт багтаан дүгнэлт гарган шийдвэрлэдэг байна. Тэгэхээр С.Эрдэнийг намын гишүүнээс хасах энэхүү шийдвэрийг ажлын тав хоногтоо багтаан шийдвэрлэж таарах нь.