“Хоёр толгойтой” Ардчилсан намын дарга, даргын үүрэг гүйцэтгэгчийн бие биеэ давах гэсэн сөргөлдөөн улс төрийн гол сэдэв болоод байна. Даргын үүрэг гүйцэтгэгч Ц.Туваан 2021 оны нэгдүгээр сарын 29-ний өдөр тушаал гаргаж, С.Эрдэнийг АН-ын гишүүнээс найман жилээр хасах шийдвэрийг гаргасан. 

Харин яг энэ өдөр буюу 2021 оны нэгдүгээр сарын 29-нд Үндэсний бодлогын ээлжит бус цахим хуралдааныг товлон зарлах тухай А05 тушаалыг АН-ын дарга С.Эрдэнэ мөн гаргажээ. Тушаалд, ээлжит бус цахим хуралдааныг 2021 оны нэгдүгээр сарын 31-ний өдрийн 11.00 цагт товлон хуралдуулахаар заасан байна. Энэ дагуу Үндэсний бодлогын хорооны ээлжит бус цахим хуралдаан яг одоо болж байна. Сийрүүлбэл, 

Үндэсний бодлогын хорооны ээлжит бус цахим хуралдааныг  товлон зарлах тухай 

Ардчилсан намын Үндсэн дүрмийн 5 дугаар бүлгийн 5.17.1, 5.17.4.11 дэх заалт Үндсэн дүрмийн хорооны 2020 оны долоодугаар сарын 13-ний өдрийн 16 дугаар “Тайлбар гаргах тухай” тогтоол, Ардчилсан намын YII Их хурлын 2017 оны 02 дугаар сарын 12-ны өдрийн 03 дугаар тогтоол,  Улсын Дээд шүүхийн 2017 оны 03 дугаар сарын 15-ны өдрийн 01 дүгээр тогтоол, Намын байгууллагуудын хурлын үйл ажиллагаа, зохнион байгуулалт, дэгийн тухай журмын 4 дүгээр бүлгийн 4.4, 4.5 дахь заалтыг тус тус үндэслэн ТУШААХ нь:

Нэг. Үндэсний бодлогын хорооны ээлжит бус цахим хуралдааныг 2021 оны 01 дүгээр сарын 31-ний өдрийн 11.00 цагт товлон зарласугай.

Хоёр. Үндэсний бодлогын хорооны ээлжит бус цахим хуралдааны хэлэлцэх асуудлыг дор дурдсан дарааллаар тогтоосугай. Үүнд,

1. Цаг үеийн асуудал,

2. Дэд дарга томилох тухай,

3. Бусад

Гурав. Үндэсний бодлогын хорооны ээлжлит бус цахим хуралдааны бэлтгэл ажил, хуралдааны зохион байгуулалтыг хангаж ажиллахыг ҮБХ-ны хуралдаан зохион байгуулах ажлын хэсэг (А.Цэрэнбат)-т даалгасугай. 

Дарга  С.Эрдэнэ гэжээ.

Ардчилсан намын хоёр даргын энэхүү тэмцэлдээн ил далд элдвээр өрнөсөөр. Тус тусдаа даргатай Ардчилсан намынхан ч тусдаа үйл ажиллагаагаа идэвхтэй явуулсаар, эцэст нь хэн нь тунаж үлдэх нь цаг хугацааны л асуудал боллоо. 

У.Тэргэл