УИХ-ын гишүүн О.Цогтгэрэл НӨАТ-ын татвараас чөлөөлөх хуулийн төсөл болон бусад асуудлаар байр сууриа илэрхийлжээ.

Тэрбээр "Одоогоос бараг 2 сарын өмнө энэ хэцүү цагт иргэдээ бид ингэж л дэмжих ёстой нүдээ олсон хуулийн төсөл гэсэн  магтаал сайшаалын дунд баяр ёслолын байдалтайгаар малын тэжээл, будаа, ургамлын тос тэргүүтнийг НӨАТ-аас чөлөөлөх тухай хуулийг хэлэлцэн баталж байв. 
Энэ үед бид мэтийн хэдэн гишүүд хэрэгжилт нь яадаг бол, нэг бүтээгдэхүүнийг босоогоор нь эцсийн хэрэглэгч хүртэл ингэж чөлөөлсөн практик өмнө байхгүй шүү, хэрэгжилтэнд нь ань хийгээрэй гэж их ч захьсан, энэ боломжтой шийдэл үү? гэж олон ч асуусан. Өмнөх чөлөөлөлтүүдийн үед эцсийн хэрэглэгчид дээр НӨАТ төлөгдсөөр байсан шүү гэж баримт хүртэл харуулаад анхааруулж байв. 
 Яг л хэлж байсан шиг өчигдрийн байдлаар Улсын их дэлгүүрийн Номинд ч, Тусгаар тогтнолын ордны В1 давхарын Оргилд ургамлын тос, гурвалжин будаа одоо хүртэл НӨАТ-тэй уншигдаж байна. 

Энэ том дэлгүүрүүд буцаан олголт, хөнгөлөлтөө шийдэж чадахгүй байхад аймгийн төв, сумын дэлгүүрүүд, байрны доод талын мини маркетууд дээр ургамлын тос, будаа зэрэг яагаад ч НӨАТ-аас чөлөөлөгдөж чадахгүй. Ахиад л ард түмнээ, бизнесүүдийг хуурсан, өөрсдөө бол их зүйл хийсэн гэж итгэсэн бас нэгэн хууль болон үлдэх нь. 
Энэ мэт Засгийн газар нь УИХ-ын гишүүдэд худалд мэдээлэл өгч, түүндээ үндэслээд УИХ нь ЗГ-тайгаа нийлж ард түмнээ, бизнесүүдийг хуурдаг явдал байна. Дараа дараагийн олон хуулиуд дээр УИХ ч, ЗГ ч үүн дээр анхаарахгүй бол мянган сайхан хууль энд батлаад амьдрал дээр хэрэгжихгүй, иргэдэд ээлээ өгөхгүй байсаар л байна" гэжээ.