У.Хүрэлсүхийн танхимд байхад л байр суурь нь дэнчигнэж байсан нэг сайд шинэхэн бүрэлдсэн Засгийн газарт улирч, ёстой л "ёндоо" сайд гэдгээ харууллаа. Уг нь өнгөрсөн Засгийн газрын хамгийн их хэл ам таталж байснаар нь түүнийг улирах сайд нарын эгнээнд багтах боломжгүй гэж таамаг дэвшүүлж байсан хүн цөөнгүй. 

Хоёр хүүхдийнхээ сургалтын төлбөрийх төрийн өмчийн мөнгөөр төлүүлсэн нь баримттайгаа ил болсон тэрбээр нэг хэсэгтээ л дуулианы гол эзнээр нэрлэгдэж байсан ч дотоодод цар тахал дэгдэж, мартагдах тал руугаа орсон юм.

Ер нь ковид чамдаа баярлалаа гэж алга хавсран суугаа нэг биш хүн бий.

Өнгөрсөн парламентын үед төрийн хатан эрдэнээр тодорч байсан эрхмээс эхлээд л нэрлэж болно. Өөр баярлалаа гэж хэлэх хүний нэг нь УУХҮ-ийн сайд Г.Ёндон юм.
Түүнийг Ерөнхийлөгч Х.Баттулга зүтгүүлсэн гэдэг. Нарийн учрыг тайлбарлавал, УУХҮ-ийн сайд Г.Ёндон, Зам тээвэр, хөгжлийг сайд Л.Халтар нарыг Ерөнхийлөгч зүтгүүлж, дараагийн Засгийн газарт ч байр суурийг нь хадгалах тохироо, нөгөө талаар шахалт үзүүлсэн гэдэг. Ийм мотортой эрхэм улирахаас өөр яах билээ. Түүнийг оны эхний хамгийн "ёндоо" сайдаар нэрлэсэн нь ийм учиртай.

Б.Лхам