Монголын авто мастеруудын холбооноос Морингийн даваанд Мастер кросс уралдааныг зохион байгуулдаг болоод багагүй хугацаа өнгөрч байна. Харин өнгөрсөн амралтын өдрүүдээр ээлжит уралдаан болох байсан ч хойшилсон тухай бид өмнө нь мэдээлсэн. Энэ талаарх ослын талаарх мэдээллийг нууж байгааг ч дурьдаж байсан билээ. Тэгвэл  Мастер кросс уралдаанд оролцож байсан тамирчин Э нь тус тэмцээнийг сонирхохоор ирсэн үзэгчийг дайрч маш хүнд гэмтээсэн учраас тус тэмцээн хойшилсон гэсэн эх сурвалжийн мэдээлэл бидэнд ирээд байна. Гэхдээ энэхүү тэмцээний үеэр хэдэн ч хүн бэртсэн байж болзошгүй юм.

Уралдааныг сонирхож байсан эх сурвалжийн мэдээлж байгаагаар дайруулж гэмтсэн үзэгч нь согтуу байсан бөгөөд уралдаж яваа машины урдуур гэнэт өөрөө гүйгээд гараад ирсэн байна.

Хохирогч залуу Гэмтэл согог судлалын үндэсний төвд сэхээн амьдруулах тасагт маш хүнд байдалтайгаар хэвтэн эмчлүүлж байгаа гэнэ. Хүний аминд хүрэх шахсан энэхүү уралдааныг зохион байгуулдаг гэх  Авто мастеруудын холбооны холбогдох мэргэжилтнүүдээс тодруулахад, "Манай байгууллагатай ямарч холбоогүй. Мастер кросс холбоо гээд байгууллагатай холбоотой" гэв. Тиймээс энэхүү хүний эрүүл мэнд хохирчихоод байхад хэн ч хариуцлага хүлээхгүй байгаа юм. Яаралтай түргэн тусламжийнхны мэдээлснээр дуудлагын дагуу очиход машин осолдсон гэх ул мөр байгаагүй ажээ. Ямартай ч энэ хэргийн цаана ямар нэг хэрэг нуугдаж байгаа нь тодорхой болоод байгаа бөгөөд энэ талаар олон нийтэд нээлттэй мэдээлэх хүн алга.