Монгол Улсын Ерөнхий сайд Л.Оюун-Эрдэнэ тэргүүтэй албаныхан өнөөдөр барилгын салбарынхантай уулзаж, цар тахлын үед тулгамдаж буй асуудлаа ярилцан, тэдний байр суурийг сонссон билээ. Энэ үеэр “Монцемент билдинг материалс” ХХК-ийн үйл ажиллагаа хариуцсан захирал Ц.Халиунаас зарим зүйлийг тодрууллаа.  

-“Монцемент билдинг материалс” ХХК Монгол Улсад анх удаа халуун хийгээс эрчим хүч үйлдвэрлэх төслийг амжилттай хэрэгжүүлсэн гэсэн. Энэ талаараа танилцуулахгүй юү ?

-Монцемент үйлдвэр 2006 оноос хойш дэлхийн зах зээл дээрх номер нэг тоглогч болох Lafarge, Holcim  хоёр компанитай хамтран Монгол Улсад анх удаа халуун хийгээс эрчим хүч үйлдвэрлэх,  нэг жилд нэг сая тонн өндөр чанарын цемент үйлдвэрлэх хүчин чадалтай төслийг амжилттай хэрэгжүүлж дууссан.  Энэхүү төслийг хэрэгжүүлж, зах зээлд бүтээгдэхүүнээ нийлүүлж эхэлснээс хойш тогтвортой үнийг хангахаар хичээж ажиллаж ирсэн ч биднээс шалтгаалахгүй асуудал бишгүй тулгарч байна.

-Төслийг хэрэгжүүлэхэд ямар хүндрэл тулгарч байна вэ?

-Түүхий эдийн үнэ өсч байгаа нь ихээхэн хүндрэл учруулах боллоо. Цементийн хамгийн чухал түүхий эд болох чулуунцар байдаг. Нүүрс чухал түүхий эд ч экспортын үнэ нэмэгдэхтэй зэрэгцэн үнийг нэмж байна. Өнөөдрийн байдлаар 50 хувийн өсөлттэй явна. Мөн цементийн түүхий эд болох төмрийн хүдрийн үнэ нэмэгдэж, дотоодын үйлдвэрлэгчдэд ам.доллараар зардаг. Энэ нь ам.долларын өсөлттэй холбоотойгоор түүхий эдийн үнэ бас дагаад өсч байна. 2016 оноос хойш валют 60 хувийн өсөлттэй явна. Тиймээс Засгийн газраас ам.доллараар түүхий эд авдаг дотоодын аж ахуй нэгжээ дэмжихэд ямар нэг арга хэмжээ авах боломж бий эсэхийг бидний хувьд өнөөдөр Ерөнхий сайд болоод түүний багийнхнаас тодруулж, зохицуулалт хийж өгөхийг хүссэн.

-УИХ-аас баталсан Хөрөнгө оруулалтын тухай хуульд газрын тос, барилгын материалын болон ноос, ноолуурын үйлдвэрлэлд дэмжлэг үзүүлэхээр заасан. Энэ дагуу үр дүнгээ өгч байна уу?

- УИХ 2013 онд Хөрөнгө оруулалтын тухай хуулийг баталж, энэ хуульд гадаад, дотоодын хөрөнгө оруулагчдыг  татварын болон татварын бус бодлогоор дэмжихээр заасан.  Хуулийн хамгийн чухал заалт болох  11.2-т Газрын тос, барилгын материалын үйлдвэрлэл, хөдөө аж ахуй, ноос ноолуурын үйлдвэрлэлд татварын дэмжлэг үзүүлнэ гэж заасан байдаг ч бусад дагалдах хуулиудтайгаа уялдаагүй учраас хууль хэрэгжихгүй байгаа.

-Засгийн газрын шинэ сайд, түүний багийнхантай уулзсаных тэднээс ямар дэмжлэг хүсч байгаа вэ?

-Хуулийг хэрэгжүүлэх хүсэлт, шаардлага, гаргалгааг бид бүх төрийн байгуулагад гаргасан. Тиймээс энэ хуулийн хэрэгжилтэд анхаарч өгнө үү гэж хүсч байна. Манай салбарынхны хэлсэн шиг валютын ханш аж ахуй нэгжүүдэд маш их дарамт, ханшийн алдагдалд оруулж байна. Авсан зээлээ гурав дахин эргүүлэн төлөх, хүү гээд ханшийн алдагдал маш хүнд тусч байгаа учраас шинэ Засгийн газар дэмжиж ажиллаасай гэж хүсч байна.

У.Тэргэл