УИХ-ын гишүүн Х.Ганхуяг, Г.Дамдинням нар Хөгжлийн банкнаас тус бүр 33 тэрбумын зээл авсан талаар манай сайт өмнө нь мэдээлсэн. Уг мөнгийг УИХ-ын гишүүн Г.Амартүвшин Хөгжлийн банкны захирлаар ажилласан зургаан сарын хугацаанд олгосон нь баримтаар нотлогдсон билээ.

Тэгвэл уг асуудлаар МАХН-ын дарга Н.Энхбаяр өөрийн байр сууриа илэрхийлжээ. Тэрбээр “Би залуучуудыг их дэмждэг хүн. Харамсалтай нь залуу Их Хурлын гишүүд Хөгжлийн банкнаас  30 тэрбум төгрөг хулгайлсан байна.

Хулгайлсан гэж л хэлнэ.

Өөр хэнд ч олддоггүй зээл МАН-ын гурван залуу гишүүнд олдсон. Нэг нь банкны захирал нь, нөгөө хоёр нь хамтарсан компани эзэмшдэг. 30 тэрбум төгрөг хайчсан бэ. Буцаад төлөгдсөн үү. Цаагуураа 120 тэрбум төгрөгний асуудал яригдаж байгаа.

Үүнийг байя гэхэд 30 тэрбумын хэдээр нь сонгууль луйвардаж авсан бэ. Үндсэн хуулийн өмнө бүгд адил тэгш эрхтэй гэсэн зарчим яагаад алдагдаад байна вэ. Ийм хариуцлагагүй хүмүүст дор нь хариуцлага тооцвол хариуцлага тооцдог нам гэж бодох байх” гэжээ.

А.Сүх