Коронавирусний халдвараас үүдэж бүх шатны боловсролын сургалт цахимаар явагдаж буй. Тэгвэл ирэх гуравдугаар сарын нэгнээс хичээлүүдийг танхимаар оруулахаар төлөвлөж байгаа гэдгийг салбарын сайд нь мэдэгдэв.

Энэ талаар Боловсрол, шинжлэх ухааны сайд Л.Энх-Амгалан "Гуравдугаар сарын нэгнээс танхимын сургалтыг эхлүүлэхээр төлөвлөж байна. Учир нь онлайн хичээл буюу теле хичээл орж байх үеэр 174 мянга гаруй сурагч гар утас, компьютергүй, интернэтгүй байна. Улаанбаатар хотод л гэхэд зөвхөн цахилгаанд холбогдоогүй 30 мянган хүүхэд байна. Тэд бүгд хичээлээсээ хоцрогдож байна. Ковидын дэглэм сахиж байгаа дэлхийн улс орнууд бүгд буюу 130 гаруй улс танхимын сургалтаа орж боловсролын салбарыг ажиллуулахыг дэмжиж байгаа юм билээ.

Гуравдугаар сарын нэгнээс эхэлж танхимын сургалтыг орон даяар эхлүүлэх саналаа УОК дээр илэрхийлсэн. Цаашдаа Засгийн газарт орж хэлэлцүүлнэ. Нийслэл дээр санаа зовоож буй нэг асуудал нь зарим сургуулийг ПСР шинжилгээ авах төв болгосон. Ариутгал халдваргүйжүүлэлт хийж бэлтгэл ажлыг хангана. Энэ тавдахь өдөр тодорхой шийдвэр гаргана гэж бодож байна" гэсэн юм. 

Харин НДШ-ийг нэмэж буй асуудалд багш нар байр сууриа илэрхийлж, цуглаан зохион байгуулах талаарх мэдээлэлд "Багш нар хамаагүй бухимдаж болохгүй. Өнгөрсөн жил батлагдсан хууль ч гэлээ долоодугаар сарын нэгэн хүртэл хойшилж байгаа учир бухимдах зүйлгүй тайван байхыг анхааруулж байна. Харин багш нар жагсаал цуглаан зохион байгуулж буй асуудал бол ганц нэгэн хүний өдөөн хатгах гэсэн л зүйл болохоос бүх багш нарын үзэл бодол гэж ойлгохгүй байна" гэх хариултыг өглөө. 

Л.Алтан