Монгол Улсын Засгийн газар УИХ-ын гишүүн Сү.Батболдыг их хэмжээний авлига, хууль бус хөрөнгө нуун дарагдуулсан хэргээр Нью-Йоркийн шүүхэд нэхэмжлэл гаргасан билээ. Харин үл үзэгдэх “гар” уг нэхэмжлэлийг буцаан татсан бөгөөд энэ дагуу Засгийн газар шуурхай арга хэмжээ авч, нэхэмжлэлийг хуулийн хугацаанд нь буюу нэгдүгээр сарын 31-ний дотор багтаан сэргээсэн.

Эл асуудлыг амжиж шийдсэн ч нөгөө талд нь “Рио Тинто” компани Монгол Улсыг Лондоны Арбитрийн шүүхэд татварын хэрэгт буруутган нэхэмжлэл гаргасан байна.

Өнгөрсөн жилийн буюу 2020 оны хоёрдугаар сард гаргасан нэхэмжлэлийн хугацаа энэ хоёрдугаар сарын 21-22-ны өдөр дуусах бөгөөд арав хүрэхгүй хоног үлдээд байгаа юм. Энэ хугацаанд амжиж Монгол Улс Лондоны Арбитрийн шүүхэд сөрөг нэхэмжлэх гаргах учиртай. Энэ талаарх шинэ мэдээллийг  УИХ-ын гишүүн Н.Алтанхуяг самбарынхаа ээлжит мэдээллээр дуулгалаа. Тэрбээр  “Монгол Улсын Засгийн газар Лондоны Арбитрын шүүхэд сөрөг нэхэмжлэх гаргах ёстой. Хугацаа үлдээгүй шүү. Үүнд, Засгийн газар, тэр дундаа Х.Нямбаатар сайд онцгой анхаарал хандуулаарай. Би онцгойлон анхаарууллаа шүү. Энэ Монголын баялаг, ард түмний баялаг. Сөрөг нэхэмжлэл гаргаж байж, Монгол Улс ялах, дийлэх боломжтой шүү”  хэмээн санууллаа.

У.Тэргэл