Цар тахлын нөхцөл байдал улам хүндэрч, голомтлон гарах халдварын тохиолдол ч эрс нэмэгдсээр байна. Хотхоноороо, эмнэлгээрээ, байгууллагаараа, орцоороо эцэстээ бүр дөнгөж төрсөн нярай хүүхдүүд эхтэйгээ бөөнөөрөө эмнэлгээс шууд тусгаарлах байр руу хүргэгдэх болж, ар гэрийнхэн нь тэмцэж байж авч үлдэх жишээтэй. Бодит байдал ийнхүү  хурцдаж байхад төр, засгийнхан ч дээгүүрээ ихээхэн хэрүүл, тэмцэлтэй байгаа аж. Учир нь, амралтын өдрийг умартан ажиллаж байгаа тэд бямбаас ням гарагт шилжих шөнө хуралдан энэ үеэр  УОК-ын дарга, Шадар сайд С.Амарсайхан, Эрүүл мэндийн сайд С.Энхболдоос арав хоногт багтаан 420 орчим өрхийн нэг гишүүнээс PCR шинжилгээ авах бэлтгэл ажлыг хангаж буй эсэхийг лавлахад тэрбээр тийм чадамж байхгүй хэмээн Шадар сайдад ихээхэн зэмлүүлсэн гэх.

Ерөнхий сайдын ахлах зөвлөх Ж.Энхбаяр, Шадар сайд, Эрүүл мэндийн сайд, УОК, НОК гээд өргөн бүрэлдэхүүнтэй хуралдсан энэ удаагийн хурал тодорхой шийдэлд хүрч чадалгүй, шийдэх асуудал нь өөрсдөөс нь давчихсан учраас дор дороо бухимдсаар тарсан байна. Харин энэ асуудлыг Үндэсний аюулгүй байдлын зөвлөл рүү шилжүүлж, тус зөвлөл яаралтай хуралдахаар болсон гэх мэдээлэл байна.

ҮАБЗ ямар эрх, үүрэг хүлээдэг вэ. Монгол Улсын Ерөнхийлөгч Монгол Улсын үндсэн хуульд зааснаар Үндэсний аюулгүй байдлын зөвлөлийг тэргүүлдэг ба Монгол Улсын Их Хурлын дарга, Ерөнхий сайд Үндэсний аюулгүй байдлын зөвлөлийн гишүүн юм. ҮАБЗ нь үндэсний аюулгүй байдлыг хангах төрийн нэгдмэл бодлого боловсруулах үйл ажиллагаа болон түүнийг хэрэгжүүлэх явдлыг уялдуулан зохицуулах, энэхүү зохицуулалтыг  хэрхэн хангаж байгаад хяналт тавих төрийн зөвлөлдөх Дээд байгууллага юм. ҮАБЗ-д багтаж байсан Монгол Улсын Ерөнхийлөгч Х.Баттулга, УИХ-ын дарга Г.Занданшатар, Ерөнхий сайд У.Хүрэлсүх нар сүүлийн үед ямар асуудлаар, хэчнээн удаа хуралдаж, зөвлөмж гаргаж байв. Жишээ татъя.

-2019 оны зургаадугаар сарын 26-ны өдөр ҮАБЗ хуралдан, нэр бүхий 17 шүүгчийн бүрэн эрхийг түдгэлзүүлэх зөвлөмжийг гаргаж байв.

-2020 оны нэгдүгээр сарын 31-ны өдөр Засгийн газар ээлжит бусаар хуралдаж, ҮАБЗ-ийн зөвлөмжийн дагуу Монгол Улстай хиллэдэг БНХАУ-ын бүх боомтоор, тодруулбал, агаарын, төмөр зам, автозамаар хятад иргэд болон гадаад улсын иргэдийг нэвтрүүлэхгүй байх. Мөн гуравдугаар сарын 2-ныг хүртэл Монгол Улсын иргэд урд хөрш рүү зорчихгүй байх шийдвэрийг гаргаж байлаа. Цаашлаад  Буянт-Ухаа болон Замын-Үүд боомтоор буцаж ирж буй монгол иргэдээ нэвтрүүлэх ба итгэмжлэгдсэн ачаа барааг хилээр нэвтрүүлж, бараа таваарын импорт, экспортыг хязгаарлахгүй гэсэн зөвлөмжийг ҮАБЗ-өөс гаргаж, танилцуулж байлаа.    

-2020 оны хоёрдугаар сарын 10-нд ҮАБЗ хуралдан цар тахалтай холбоотойгоор Цагаан  сарыг тэмдэглэхгүй байх зөвлөмжийг гаргасан.

-2020 оны арваннэгдүгээр сарын 11-ны өдөр Монгол Улсад цар тахлыг дотооддоо алдан,  онцгой нөхцөл байдал үүссэн тул ҮАБЗ хуралдан, мэдэгдэл гаргаж байв. Мэдэгдэлд,  хүн бүр дороо хариуцлагатай байж, цар тахлын үеэр авч хэрэгжүүлэх дэглэмийг сайтар сахиж, энэхүү хүнд үеийг хамтдаа даван туулах хэрэгтэйг онцлон, эв нэгдэлтэй байхыг уриалж байв.

-Хамгийн сүүлд буюу 2021 оны нэгдүгээр сарын 21-ний өдөр Монгол Улсын Ерөнхийлөгч Х.Баттулга Үндэсний аюулгүй байдлын зөвлөлийн шуурхай хуралдаан зарласан ч энэ нь Засгийн газар танхимаараа огцрох шийдвэртэй давхцсан тул хуралдаж чадаагүй юм. 

Харин одоо ҮАБЗ шинэ Ерөнхий сайдтайгаар дахин хуралдаж, цар тахлын давагдашгүй хүчин зүйлийг хэрхэн даван туулах талаар тодорхой шийдэлд хүрч, эргэлзээтэй олон асуудлыг нэг мөр болгох нь.

У.Тэргэл