"Оюутолгой"-н ордын ашиглалтад Монгол Улсын эрх ашгийг хангуулах тухай УИХ-ын 2019 оны 92-р тогтоолын хэрэгжилтэд хяналт тавих Ажлын хэсэг байгуулж байгаа талаар УИХ-ын гишүүд мэдээлэл хийлээ.

Ажлын хэсгийн ахлагчаар УИХ-ын гишүүн Т.Аюурсайхан ажиллахаар болсон байна.  Тэрбээр энэ талаар "Томоохон ажлын хэсгийг байгуулсан. Монголын хөгжлийн хувь заяатай холбоотой чухал асуудал яригдаж байна. Ажлын хэсэгт 20 гишүүн багтсан. Ахлагчаар миний бие ажиллаж байна. УИХ-ын олонх, цөөнх бүх гишүүдийг хамруулсан өргөн хэмжээний ажлын хэсгийг байгуулсан.

"Оюутолгой"-н гэрээнд олон нийт зөрүүтэй мэдээлэл авч байсан. Оюутолгойн гэрээ саяхныг хүртэл ашигтай гэдэг мэдээллийг цацаж байсан. Тэгвэл Дубайн гэрээ хохиролтой Монгол Улсын эрх ашгийг хангуулж чадахгүй байна гэдгийг нээлттэй мэдээлэх хэрэгтэй. Дубайг гэрээг өөрчлөх сайжруулах ёстой. УИХ энэ гэрээг байгуулаагүй. Зөвхөн Засгийн газрын тэргүүн нь Оюутолгойн гэрээг байгуулсан. Тиймээс гэрээг сайжруулах шаардлагатай гэж үзэж байгаа. Ажлын хэсэг Оюутолгой Монгол Улсад ашигтай бус хохиролтой гэдгийг тогтоосон. Бидэнд маш их дарамт шахалт ирэх нь тодорхой. Гэхдээ бид улс эх орныхоо баялагийг эх орондоо үлдээхийн төлөө ажиллах болно" гэв. 

Мэдээллийн дараа гишүүд сэтгүүлчдийн асуултад хариуллаа. 

-Засгийн газраас бас ажлын хэсэг гарсан. Засгийн газрын ажлын хэсэгтэй хэрхэн хамтарч ажиллах вэ?

-УИХ баталсан тогтоолдоо хяналт тавьж хэрэгжилтийн хянах зорилгоор 20 гишүүнээс бүрдсэн ажлын хэсгийг байгуулсан. Харин Засгийн газраас гарсан ажлын хэсгийн хувьд гэрээг өөрчлөх асуудлаар хэлэлцээ хийнэ.

-Ажлын хэсгийн чиглэлийг тодруулбал?

-Нийтдээ долоон чиглэлд ажиллана. Засгийн газрын үйл ажиллагаанд УИХ хяналт тавьж ажиллах ёстой. Дубайн гэрээ буюу далд уурхайн бүтээн байгуулалтын санхүүжилтийн төлөвлөгөө Монгол Улсад маш хохиролтой байгаа нь тодорхой байсан. Монгол Улс ашиг авахгүй харин эсрэгээрээ өрөнд орохоор байна. Гадны хөрөнгө оруулагчид ашиг авч байна. Ийм байдлаар Монгол Улсын өр нэмэгдэнэ. Тийм учраас хуульд нийцүүлэх ёстой, Монгол Улсад ашигтай болгон сайжруулах ёстой гэж үзэж байгаа юм. Оюутолгойн гэрээ ашиггүй. Ухуулж дуусаад 22 тэрбум ам.долларын өртэй үлдэх нөхцөл байж болохгүй. 

Б.Баатар