Ерөнхий сайд Л.Оюун-Эрдэнэ “Эрүүл мэндээ хамгаалж, эдийн засгаа сэргээх 10 их наядын цогц төлөвлөгөө”-гөө танилцууллаа. Энэ үеэр УИХ-ын дарга Г.Занданшатар үг хэллээ.   

Тэрбээр “Дэлхий даяар нүүрлэсэн цар тахал Монгол Улсад ч ялгаагүй эдийн засаг, иргэдийн амьдралд сөргөөр нөлөөлж байна. Энэ цагт бид хүчээ нэгтгэж байж давж гарна. Өнгөрсөн онд бид байгаа бүх боломжоороо зүтгэсэн.

УИХ, Засгийн газар “дуугарвал дуу нэг, дуугтарвал хүч нэг” хэмээн ажилласан.

Энэ цаг мөчид ч хичээж ажиллаж байна. Засгийн газар 10 их наядын гурван жилийн цогц төлөвлөгөө боловсруулан иргэддээ танилцуулж байна. Энэ бол улсын төсвийн нэг жилийн нийт хэмжээтэй тэнцүү хэмжээний их мөнгө. УИХ хууль эрх зүйг улядаа холбоогоор хангахаар ажиллаж байна.

Ардын хувьсгалын 100 жилийн ойгоор Монгол Улс сэргэн мандах учиртай. Үүний төлөө бүгд хүчээ нэгтгэх ёстой. Тиймээс эдийн засагч, эх оронч, эрүүл Монгол байя гэж уриалж байна.

УИХ, Засгийн газрын хамтарсан ажлын хэсэг мега төслийг хэрэгжүүлэхэд хүчээ нэгтгэн ажиллаж байна. Иргэдийн үнэмлэхүй итгэлийг зүтгэлээр хариулж байж шинэ сэргэлтийн эхлэлийг тавина гэж үзэж байна. Шинэ залуу үеэ эерэг хандлагаар хүмүүжүүлж, улс орныхоо хөгжлийн төлөө шинэ цаг ирж байна гэж бодож байна.

Эрүүл мэнд, эдийн засгаа сэргээх 10 их наядын цогц төлөвлөгөөг хэрэгжүүлэхэд хүн бүрийн оролцоо чухал.

Эв санаа, хүчээ нэгтгэж сэргэн мандлын төлөө тууштай зүтгэхэд гагцхүү бидний чин зориг мэднэ” гэлээ.

Б.Лхам