Улсын Онцгой комиссоос мэдээлэл хийж байна.

Шадар сайд С.Амарсайхан "2021 оны хоёрдугаар сарын 11-ний өдрийн 06.00 цагаас 02 дугаар сарын 23-ны өдрийн 06.00 цаг хүртэл нийслэлд Гамшгаас хамгаалах бүх нийтийн бэлэн байдлын зэрэгт хэсэгчлэн шилжүүлэхээр болсон. Хэрэв хөл хорио тогтоож, халдварыг яаралтай хумихгүй бол халдварын тоо 5000-д хүрнэ гэсэн судалгааг эрдэмтэд гаргасан. Тиймээс энэ арга хэмжээг авахаар болсон гэдгийг ард иргэд ойлгох хэрэгтэй. 

Ажиллах бүтцийн хувьд УОК, УОК-ын Шуурхай штаб, ЦЕГ, ОБЕГ, ЭМЯ, түүний харьяа байгууллагууд болох Нийслэлийн онцгой болон дүүргийн онцгой байдлын газрын мэргэжилтнүүд, нутгийн захиргааны байгууллагынхан, ДХИС ажиллана. 

Энэ хугацаанд албан эх сурвалжийн мэдээллийг үнэн зөвөөр өгч байх зорилгоор "Эрсдлийн үеийн мэдээлэл харицлааны түр хороо" байгуулж, нэгдсэн мэдээлэл өгөх шийдвэр гаргасан. Ингэхгүй бол батлагдаагүй мэдээллийг тал талдаа өгч, иргэдийг бухимдуулдаг учир ийнхүү нэгдсэн мэдээлэл өгч байхаар болсон.

Гаргасан шийдвэрийн хэрэгжилтийг шат шатанд нь тооцож, дүгнэж байх зохион байгуулалтад орж ажиллахаар "Эрсдлийн үеийн Хяналт, шинжилгээ, үнэлгээний хороо"-г мөн байгуулсан. Бүх шатны хяналтыг хийж, УОК тайлангаа тавих юм. 

Шуурхай штабын бүрэлдэхүүнд яамдын дэд сайд нар орж ажиллахаар болсон. 

"Нэг хаалга-Нэг шинжилгээ"-ний хүрээнд хоногт 35-40 мянган хүнийг шинжилгээнд хамруулна. Ингэхдээ голомт хурдацтай тархаж байгаа дүүрэг, хороодоос эхлүүлнэ. 

Дээрх хугацаанд үйл ажиллагааг нь хязгаарлахгүй байгууллагууд:

1.    Эрчим хүч, дулаан, усан хангамж, ариутгал, хог хаягдал, нийтийн аж ахуй, инженерийн хангамж

2.    Эрүүл мэндийн байгууллага, эм, эмнэлгийн хэрэгсэл, ханган нийлүүлэх

3.    Улсын онц чухал болон стратегийн ач холбогдол бүхий объект, байгууллага /"УБТЗ" ХНН, "Чингис хаан", ИНЕГ, түүний харьяа алба салбар, “Буянт-Ухаа” олон улсын нисэх буудал, "МИАТ" ТӨХК, "Биокомбинат" ТӨҮГ, уул уурхайн салбарын хангалт, Үндэсний дата төвийн нөөц төв, Дипломат төлөөлөгчийн газар, НҮБ-ын суурин төлөөлөгчийн газар, түүний ажилтан, албан хаагчдын 10 хүртэлх хувь ажиллах, цагийн хязгаартай/

4.    Тусгайлсан чиг үүрэг бүхий байгууллага

5.    УИХ, төрийн захиргаа, төрийн болон нутгийн өөрөө удирдах байгууллага, гааль, шүүх, прокурор, өмгөөлөл, нотариат, Сонгуулийн ерөнхий хороо /ажилтан, албан хаагчдын 10 хүртэлх хувь ажиллах, цагийн хязгаартай/

6.    Хүүхэд хамгааллын үйлчилгээ, асрамж халамжийн төрөлжсөн байгууллага, МУЗН

7.    Хүнсний үйлдвэрлэл, тээвэрлэлт, түгээлт, худалдаа

8.    Мал, амьтны өвс, тэжээлийн тээвэрлэлт, түгээлт

9.    Газрын тосны бүтээгдэхүүн, түлшний хангамж, түгээлт, тээвэрлэлт

10. Сайжруулсан түлшний үйлдвэрлэл, нийлүүлэлт, тээвэрлэлт, түгээлт

11. Банкны цахим болон автомат тооцооны машин

12. Хэвлэл мэдээлэл, харилцаа холбоо, шуудан, илгээмж

13. Зөвшөөрөлтэй харуул хамгаалалтын байгууллага

14. Оршуулга