Хэрвээ хэлсэн үг нь үнэн бол цар тахлын үед Шадар сайд, УОК-ийн зохион байгуулж байгаа сүүлийн хөл хорио өнөөдөр эхэлж байна. Энэ өдрөөс дөрвөн хоногийн өмнө Шадар сайд болон Улсын онцгой комиссынхон Улаанбаатар хотын дүүрэг болоод хорооны Засаг дарга нартай уулзалт хийсэн юм.

Хөл хорионы үед хэрхэн ажиллах стратегиа танилцуулсан эл хурал дээр УОК-ийн дарга, Шадар сайд С.Амарсайхан “Цаашид хэвийн горимоор ажиллаж амьдрах эсэхээ шийдэх уулзвар дээр бид ирээд байна. Иймээс энэ удаагийн хөл хориог хэрхэн зохион байгуулж ажиллахаас бүх зүйл шалтгаална. Бэлтгэл ажил хангагдаж байна.

Энэ удаагийн хөл хориогоор Ямар нэгэн учир битүүлэг, ойлгомжгүй зүйл байхгүй байх болно. Мэдээллийг нэг урсгалаар явуулна, хэн юу хийх нь маш тодорхой байна. Шадар сайдын дэргэд байгуулагдаж байгаа Мэдээллийн сүлжээний үндэсний түр хороогоор нэг урсгалаар мэдээллийг явуулна. Эрсдэлийн дөрвөн зэргийг тогтоогоод өнгөөр ялгана. Ямар өнгийн үед юуг хэрхэн зохион байгуулах нь тодорхой болно. Өмнөх шигээ үүрэг даалгавар өгөөд л орхихгүй, зургаар цаасаар, өнгө будгаар ялгаад өгөх учир бүх зүйл ойлгомжтой болно.

Өнгө будгаар ялгаад цаасаар албажуулчихсан энэ үед өмнөх шигээ хөл хорионы үед хөл толгой нь мэдэгдэхгүй байдаг явдал алга болно. Бүх зүйл зурагт ил тод байх учир иргэд нэг км радиуст байгаа хүнсний дэлгүүрээс хүнсээ алхаж очоод авч болно, өмнөх шиг өөр дүүргээр хэсээд явдаггүй болно. Хөл хорио гэдэг яаж явагдах ёстойг харуулж ажиллана. Иргэд хөл хорионоос болж амиа алддаггүй байх ёстой, хүнсээр тасалддаггүй байх ёстой” хэмээн итгэл төгс хэлж байлаа.

Түүний яриаг сонсоход үнэхээр ч өмнөхөөсөө өөрөөр ажиллах юм шиг, мэдээлэл нь ил тод, нээлттэй, нэг урсгалаар ойлгомжтой иргэдэд хүрэх юм шиг итгэл төрж байлаа. Энэ уулзалтад оролцсон шадар сайдын ахлах зөвлөх Ж.Энхбаяр ч мөн “Өмнөх алдаа бол мэдээллийн урсгал тодорхой бус байсан. Үүнийг өөрчилж нэг урсгалаар ил тодоор өгдөг болно. Суурь өвчтэй хийгээд хүндэрсэн хүмүүсийг л эмнэлгээр эмчилнэ. Хөнгөн туссан, шинж тэмдэггүй хүмүүсийг гэрээр эмчилж, шаардлагатай эм, хүнсээр хангана, Сэтгэл зүйчид ажиллана” гэж хэлж байсан билээ.

Эрүүл мэндийн сайдаар ахлуулсан Эрүүл мэндийн багц, Хууль хүчнийхнээр ахлуулсан хэв журам сахиулах багц, хотын дарга нараар ахлуулсан хангамжийн багц гэсэн гурван ажлын хэсэг гарган хөл хорионы үед ажиллана гэдгээ хөл хорионоос дөрвөн хоногийн өмнөх хурал дээр хэлж байсан. Гэтэл  өнөөдөр мөнөөх сүүлийн хатуу хөл хорионы өдрүүд эхлэж байна.

Харамсалтай нь өчигдрийн УОК-ийн хурлаас хөл хорионы үед хэрхэн, яаж ажиллах талаархи тоймтой хариултыг хэн нь ч хэлсэнгүй. Өрх бүрээс өгөх иргэн ямар цэгт, хэдэн цагт очиж шинжилгээ өгөх, хүнсний дэлгүүрүүд хэрхэн ажиллах, ажил үүргээ явуулах байгууллагуудын ажилтнууд хэрхэн ажиллах зэрэг бүх асуулт хариултгүй хоцорлоо.

Хөл хорио эхлэхээс хэд хоногийн өмнөх өнөөх эрч хүч, гоё яриа, гол шийдлүүд нь хаашаа одоо вэ гэмээр бүрхэг хариултуудыг нээлттэйгээр үлдээгээд Улсын онцгой комисс энэ удаагийн хөл хориогоо ийнхүү эхлэж байна. Хөл хорио нь нэг үгээр хөл толгой нь мэдэгдэхгүй эхлэлээ. Дөрвөн өдрийн өмнө яриад байсан дөрвөн өнгийн зэрэглэлийн зураглал хаана байна, мэдээллийн тодорхой нэг урсгал нь хаана байна, нэг км-ын радиуст байгаа хүнсний дэлгүүрүүдийн байршил нь хаана байна, хамгийн гол нь нэг өрхийн нэг иргэн нь хаана, хэзээ очиж шинжилгээнд хамрагдахыг хэлж заах чиглүүлэгч нь хаана байна вэ?

Гоё үг яах вэ, гол нь үр дүн. Бардам ам, шалдан гуя баймааргүй байна аа, Шадар сайд аа.

С.Сүлд