Засгийн газрын сайд нараас иргэдийн талархлыг хамгийн ихээр хүртэж байсан нь Боловсрол, шинжлэх ухааны сайд Л.Энх-Амгалан юм. Ганц гялтганах сайдтай боллоо, уруудан доройтсон энэ салбарт ихийг хийнэ дээ хэмээн итгэл найдвар тавьж байсан сайд маань өнөөдөр олон нийтийг талцуулаад байна.
Боловсрол, шинжлэх ухааны сайд Л.Энх-Амгалан хувийн сургууль тэр дундаа 10 ба түүнээс дээш сая төгрөгийн төлбөртэй сургуульд хувьсах зардлыг өгөхгүй байхаар шийдвэрлэсэн нь ийнхүү талцлын эхлэл болсон билээ.
Тодруулбал, тэрбээр энэ талаар “Хувийн сургуулиуд адилхан танхимаар хичээллэхгүйгээс зардал хэмнэж байгаа. Дээр нь төрөөс цахилгаан дулааныг нь хөнгөлж байна.
Ажилчдынх нь нийгмийн даатгалын шимтгэлийг төр хөнгөлж байна. Дээр нь нэг хүүхдээс 10 сая төгрөг авч байна. Гэтэл төрийн сургуульд явдаг 170.000 хүүхэд хичээлийн хоцрогдолд орсон. Нийслэл хотод 30.000 гаран хүүхэд тог цахилгаангүй, зурагтгүй, кабельгүй, утасгүй, компьютергүй орчинд байна.
Хувийн сургуулиудаас хэмнэсэн хувьсах зардлыг амьдралын боломжгүй, цахимаар болон теле хичээл авах боломжгүй хүүхдүүдэд зориулна” хэмээн өөрийн цахим хуудаснаа тайлбарлажээ.
Хувийн хэвшлийн үйл ажиллагаатай 5 сая хүртэлх төлбөртэй 106 сургууль, 5-10 сая төгрөийн төлбөртэй 12 сургууль, 10-аас дээш сая төгрөгийн төлбөртэй 8 хувийн сургууль байдаг аж. Сар шинийн өдрүүдэд энэхүү мэдэгдэл олон нийтийг талцуулж, сайдыг будаач будаач гэхээр сахлаа будлаа хэмээн шүүмжлэгсэд олширсон. Харин Боловсрол, шинжлэх ухааны сайд үүнд зохион байгуулалттай, төсөвтэй, захиалагчтай нэр нүүрээ нуусан троллуудаас айхгүй шүү” хэмээн эсэргүүцлээ илэрхийлээд байна.
У.Тэргэл
Сэтгэгдэл (68)