УИХ-ын чуулганы танхимд тангараг өргөхдөө л бүтэлгүйтэж, аяг аашаараа өөрийгөө хэн гэдгийг төвөггүй таниулж байсан Соёлын сайд Ч.Номингийн эхний чих дэлдийлгэм шийдвэр нь “Эрсдэлийн мэдээллийн хороо” байгуулах байлаа. Ч.Номин сайд хорооны даргаар, харин нарийн бичгийн даргаар нь Харилцаа холбоо, мэдээллийн технологийн газрын дарга Б.Болор-Эрдэнэ ажиллахаар болжээ. Тус хорооныхон битүүний өдөр яамдын удирдлагууд болон МХЕГ-ын дарга нартай цахимаар хуралдсан байна. Улмаар “Эрсдэлийн мэдээллийн хороо” нь иргэдэд хүргэх мэдээллийг цензурдах, нөлөөллийн контент түгээх, Засгийн газрын нэр хүндийг хамгаалах, мэдээллийн нууцын санг бий болгох чиглэлээр ажиллах юм байна.

Мэдээллийн эрин зуунд иргэд өөр өөрсдийн шугамаар мэдээллийг авч, өөр өөрсдийн шүүлтүүрээр оруулж, үнэн худлыг ялгаж, салгаж буй. Гэтэл  “Эрсдэлийн мэдээллийн хороо” нь өргөн хүрээгээр, тодруулбал,  хэвлэл мэдээллийн салбар ч үүнд хамаарч, цаашлаад иргэдийн үзэл бодлоо илэрхийлэх, хуваалцах индрийг ч цензурдах гэж байна.

Ардчилсан нийгэмд иргэн бүр үгээ хэлэх, үзэл бодлоо илэрхийлэх эрхтэй. Энэ эрхийг маань Үндсэн хуулиар баталгаажуулсан байдаг. Харин Соёлын сайд Ч.Номин хувийн бизнес эрхэлж, хувиараа телевиз ажиллуулж, энэ хэрээрээ дур зоргоороо аашилж ирсэн нэгэн. Хувийнх нэг өөр, хувьсгалын үйл хэрэг тэс ондоо. Үүнийг ойлгох нь бүү хэл ухаарах ч сөхөө түүнд алга.

Нэг бүдэрвэл долоо бүдэрнэ гэгчээр анхнаасаа л шүүмжлэл, инээд доог дунд ажлаа эхлүүлсэн Ч.Номин сайдаас цаашид юуг ч хүлээгээд нэмэргүй гэдгийг дээрх үйл явдал нотоллоо. Та салбартаа юу хийхээр төлөвлөж байна. Юунаас ажлаа эхлэх вэ гэх гишүүний асуултад Ч.Номин “Зургаан сарын дараа хариулъя” хэмээн хоёр гараа халаасандаа шургуулчихсан хээвнэг хариулж зогссон. Төрийн хүн ямар байхыг судлаад, асуугаад мэдчих ухаан түүнд байдаггүй юм гэхэд төлөв төвшин байх ёстойг мэдэрмээр.

УИХ-ын чуулганы танхимд хоёр гараа халааслачихаад тоймтой хэлэх үггүй зогссон түүнийг харсан хэн бүхэн “Яана даа, энэ төрийн сайд хийж чадах уу” гэдэг асуултыг  өөр өөртөө тавьж байсан биз ээ.  

У.Тэргэл