БШУ-ын сайд Л.Энх-Амгалан сургуулиудын сургалтын төлбөр, хувьсах зардалд анхаарал хандуулаад эхэлжээ. Тэрбээр Сар шинийн баярын өмнөхөн "10 сая төгрөгөөс дээш төлбөртэй сургуулиудад хувьсах зардал өгөхгүй" гэдгээ мэдэгдсэн. Энэ нь ч олны талархлыг хүлээгээд буй.

Тэгвэл одоо өмнөх сайдын гаргасан "Балаг"-тай түр журмыг баллуурдах болов уу гэсэн хүлээлт үүсэв. 

Тодотговол, БШУ-ны сайд асан Л.Цэдэвсүрэн 2020 оны нэгдүгээр сарын 18-ны өдөр тушаал гаргаж, хувийн хэвшлийн бүх шатны сургуулиудын сургалтын төлбөрийг зохицуулах "Түр журам"-ыг баталсан байдаг. 

"Өмчийн хэлбэр харгалзахгүй бүх шатны боловсролын байгууллага суралцагчийн сургалтын төлбөрт хөнгөлөлт үзүүлэх, дараагийн төлбөрт шилжүүлэх Түр журам"-д:

Сургалтын төлбөрийг эцэг эхчүүдийн санхүүгийн нөхцөл боломжинд суурилан уян хатан нөхцлөөр сар, улирлаар тооцон авах, Төлбөрийн хөнгөлөлтийн хэлбэрүүдийг ярилцан эцэг эхийн хөдөлмөр эрхлэлт, орлогын байдлыг харгалзан үзэж, хөнгөлөлт үзүүлэх, теле хичээлээс гадна суралцагчид цахим хичээл, давтлага өгсөн тохиолдолд түүнд зарцуулсан зардлын тооцоо нь төлбөртэй хэрхэн уялддаг талаар эцэг, эхэд мэдээлж, дээрх зорилгоор дахин нэмэлт төлбөр авахгүй байх, Оюутны цахим хичээлд хамрагдсан ирц, идэвхи, чадвар, явцын дүн зэргийг харгалзан олон төрөлт хэлбэрээр сургалтын төлбөрийн хөнгөлөлт үзүүлэх зэргийг журамласан.

Шуудхан хэлэхэд эдгээр нь ердөө л сургуулиудад давуу байдал олгосон журам болсон. 

Тэгвэл Л.Цэдэвсүрэн сайдын энэхүү журмыг Л.Энх-Амгалан сайд "баллуурдаж" мэдэх нь.  Тэрбээр "Хувийн сургуулиуд адилхан танхимаар хичээллэхгүй байгаа учир зардал хэмнэж байгаа. Дээр нь төрөөс цахилгаан дулааныг нь хөнгөлж байна. Ажилчдынх нь нийгмийн даатгалын шимтгэлийг төр хөнгөлж байна" гэдгийг онцолсон.

Үүнээс үзэхэд, коронавирусний цар тахалтай холбоотойгоор танхимаар бус цахимаар хичээллэж байгаа сургуулиудын сургалтын төлбөрийг зохицуулахад Л.Энх-Амгалан сайд анхаарал хандуулах бололтой. Энэ эрхийг ч Засгийн газар өмнө нь салбарын яаманд нь өгсөн. 

Б.Баатар