Ерөнхий сайд Л.Оюун-Эрдэнэ өнөөдөр ХӨСҮТ-д ажиллаж, вакцин хүлээн авах, хадгалах бэлэн байдалтай танилцлаа.

Энэ үеэр тэрбээр "Нэг хаалга-нэг шинжилгээг 230 мянган хүнийг хамруулаад байна. Хоёрдугаар сарын 22-ны өдрийг хүртэл 412 мянган өрхөөс шинжилгээ авна. Та бүхэн сайн ажиллаж байгаад талархал илэрхийлье. Энэхүү шинжилгээий дараа Улаанбаатар хотыг шар бүс болгон зарлахаар төлөвлөж байгаа. Эрүүл мэнд нэгдүгээрт эдийн засаг хоёрдугаарт биш. Аль, аль нь нэгдүгээрт гэсэн зарчмаар явж байна.

"Нэг хаалга нэг шинжилгээ"-гээр 23 хүнээс халдвар илэрсэн. Хэрэв энэ шинжилгээг хийгээгүй бол бүх нийтийг хамарсан цар тахал болох байсныг үгүйсгэхгүй.

Энэхүү шинжилгээний дараа вакцинжуулалтын ажлыг эхлүүлнэ. ДЭМБ-ын яаралтай үед хэрэглэх вакциныг манай улс оруулж ирж вакцинжуулалтыг хийнэ. Бүх зүйл бэлэн гэвэл татан авалтаа хийнэ. Үүнд ажлын хэсэг гарч, ажиллана. Вакцины талаар иргэдийн дунд маш их эргэлзээ, мэдэхгүй зүйл байгаа. Тиймээс иргэдэд энэ талаарх ойлголт, мэдээллийг илт тод өгөх хэрэгтэй. Бид ДЭМБ-ын удирдамжийг мөрдөн ажиллана. Вакцин оруулж ирэхэд гэрээний ганц нэгэн заалт дутуу байгаа гэж ойлгож байгаа. Тиймээс Засгийн газар энэ тал дээр анхаарал хандуулж ажиллана. 

Коронавирусний цар тахлыг даван туулах ганц арга бол вакцинжуулалт. Тиймээс вакцинжуулалтыг яаралтай хийхээс өөр арга байхгүй. 

Коронавирусний эсрэг вакцин татаж авах ажлыг өнөөдөр эхлүүлнэ. Тээвэрлэлт, хадгалалтад мэргэжлийн хяналтын байгууллагаас нарийн хяналт тавина. Вакцинжуулалтын ажлыг үе шаттай эхлүүлнэ. Ингэхдээ эрүүл мэндийн салбар, онцгой, цагдаа гээд халуун голомт дээр ажиллаж байгаа албан хаагчдаа вакцинжуулна. 

Вакцины хамгийн анхны тунг Ерөнхий сайд миний бие тариулж, нийт иргэддээ уриална. Энэ нь коронавирусний вакцин нь аюулгүй юм байна гэдгийн нотолгоо болно.

Коронавирусний цар тахал нь цогц асуудал гэдгийг хүн бүр ойлгож, ажиллах асуудал. Дахин хэлэхэд, бид сөрж бус, довтолж ажиллах ёстой. Засгийн газрын нэрийн өмнөөс та бүхэнд талархаж буйгаа илэрхийлье" гэлээ.

Б.Баатар