МАН, МАХН нэгдэх тухай яриа явсаар эцэстээ баталгаажиж байх шиг байна. Одоогийн байдлаар, урьдчилан тохироотой,тал талдаа тавьсан саналаа нам дотроо зөвшилцөж байгаа гэсэн мэдээлэл байна. Ганц энэ удаагийнх бус. 2016 оны УИХ-ын сонгуулийн өмнө яг ийм үйл явц өрнөж байв. МАН, МАХН Эх орончдын өдрийг гуравдугаар сарын 1-ний өдөр хамтран тэмдэглэж байлаа. Гэвч нэгдээгүй, сонгуульд ч эвсч ороогүй.

Харин энэхүү үйл явц өдгөө дахин давтагдах бололтой. Удахгүй болох Эх орончдын өдрөөр МАН түүхт 100 жилийнхээ ойтой золгоно. Энэ түүхэн өдөр МАН, МАХН-ын удирдлагууд хамтдаа Сүхбаатарын хөшөөнд цэцэг өргөж зогсвол гайхах хэрэггүй болж байна.

МАХН-ын дарга Н.Энхбаярын хувьд эн тэргүүний зорилго нь хүү Э.Батшугарыгаа Д.Сумъяабазарын оронд буюу Сонгинохайрхан дүүргийн УИХ-ын нөхөн сонгуульд сойх, улмаар  МАН-аас нэр дэвшүүлэх гэх таамаглал хөвөрч байна. Энэ нь байж болох тод хувилбар. Хамгийн гол нь Э.Батшугар Сонгинохайрхан дүүргээс УИХ-ын сонгуульд хоёронтаа нэр дэвшин, өвдөг шороодсон. Гэлээ ч тус дүүргийн сонгогчдод хэдийнэ танигдсан нь давуу тал юм.   

Мөн намынхаа үйл хэргээс гажсан хэрэгтээ  хөөгдөн, саяхан гишүүнчлэлээ эргэн сэргээсэн С.Мөнхчулуун МАН-аас Сонгинохайрхан дүүргийн УИХ-ын нөхөн сонгуульд өрсөлдөнө гэсэн бас нэгэн хувилбар байна. Сонгинохайрхан дүүргийн иргэдийн дунд нэр хүндтэй, УИХ-ын сонгуульд сонгогчдын дийлэнхийн итгэл хүлээж байсан нэгэн. Харин юуны учир УИХ-ын нөхөн сонгуулийн өмнө ийнхүү гишүүнчлэлээ сэргээв. МАН-ын Ерөнхий нарийн бичгийн дарга Д.Амарбаясгалан ихээхэн ач холбогдол өгч,  цахим хуудастаа нийтэлж, олны анхааралд оруулахыг хичээв. Энэ бүхэн нөхөн сонгуульд нэр дэвших нь гэсэн таамгыг дэвшүүлэхэд хүргэж байна.

Энэ мэтээр улс төр өрнөөд эхэлчихлээ. Мөн ирэх өдрүүдэд өрнөх Ерөнхийлөгчийн сонгууль угтсан хамгийн том улс төр бол Монгол Улсын Ерөнхийлөгч Х.Баттулгад импичмент үзүүлэх юм. Намрын чуулган завсарлан улс төр нам гүмхэн байгаа мэт боловч цаанаа улам хурцдаж, улс төрийн элдэв тохироо, наймаа ид үргэлжилж  байна.

У.Тэргэл