Өөрийгөө босоо Ганбаа гэж өргөмжилдөг ч үнэндээ түүнийг “шороо” Ганбаа гэж хэлж болно. Сонгууль болгоноор л шороо манарган тууж явдаг түүнийг ингээд хэлчихэд нэг их буруудахгүй.

Дөрвөн жилийн өмнө тэрбээр Ерөнхийлөгчийн сонгуульд нэр дэвшин улс орон даяар шороо манаргасан. Манарсан их шороо нь одоо ч замхарч амжаагүй л байна. “МАХН-аас Ерөнхийлөгчийн сонгуульд нэр дэвшигч С.Ганбаатарын олон нийтийн цахим сүлжээнд тавигдсан гадаадын иргэдээс хандив авч байгаа хэргийг зохих газар шалгасан.

Шалгалтын хүрээнд цагдаагийн байгууллага тухайн үеийн МАХН-аас Ерөнхийлөгчийн сонгуульд нэр дэвшигч С.Ганбаатараас энэ талаар тайлбар авахаар зургадугаар сарын 21, 23-ны өдрүүдэд Дундговь, Өмнөговь, Улаанбаатар хот, Хөвсгөл аймгуудад хүсэлт тавихад тэрээр шалгуулахаас татгалзсан.

Цагдаагийн байгууллагаас дээрх гомдлын шалгалтын явцад олон нийтийн сүлжээнд тавигдаад байгаа гадаадын иргэдээс мөнгө авч байгаа бичлэг нь 2017 оны тавдугаар сарын 23-ны өдөр С.Ганбаатарын гэрт болсон үйл явдал мөн болох нь, мөн түүнчлэн тухайн бичлэг нь ямар нэгэн эвлүүлэг, засварлалт, дуу хоолойн өөрчлөлтгүй болох нь тогтоогдсон. Тухайн бичлэгт байж байгаа С.Ганбаатарын дуу хоолой С.Ганбаатарын өөрийн дуу хоолой болох нь мөн тогтоогдсон. Үүнийг үндэслээд цагдаагийн байгууллагаас С.Ганбаатарын оршин сууж байгаа нутаг дэвсгэрийн шүүх буюу Баянзүрх дүүргийн шүүхэд түүнийг Сонгуулийн тухай хууль тогтоомж зөрчсөн эсэхийг тогтоолгохоор 2017 оны зургадугаар сарын 22-ны өдөр албан ёсоор шилжүүлсэн” гэж ЦЕГ-ын Эрүүгийн цагдаагийн албаны III хэлтсийн дарга, цагдаагийн хурандаа Д.Дагвасүрэн хэлсэн нь өдгөө цагаан дээр хараар бичигдэн үлдсэн байна.

Өмнөх Ерөнхийлөгчийн сонгуулийн өмнө манаруулсан “шороо” Ганбаагийн үйлдэл ингэж авлигаар төгссөн байх жишээтэй. Гэсэн ч тэрбээр энэ үйлдэлдээ ямар нэгэн ял хүлээлгүй УИХ-д нэр дэвшээд сонгогдоод ороод ирсэн.

Уг нь 2019 оны арванхоёрдугаар сард батлагдсан Сонгуулийн тухай хуульд “Авлигын хэргээр ял авсан шүүхийн тогтоолтой этгээдийг нэр дэвшүүлэхгүй…” гэсэн заалт бий. Бас сонгуульд нэр дэвшигч гадаадын иргэнээс хандив авахыг хатуу хориглодог.  Гэвч гадаадын иргэнээс гэртээ хандив нэрээр авлига авсан бичлэг нь ард түмэнд хүрсэн шороо Ганбаа Эрдэнэтэд нэр дэвшсэн. Хууль бусаар авсан тэр 50 сая воныг Мүүний шашныхны санхүүжилтээс гарсан гэж ч хэлдэг юм билээ. Манаргасан их шороондоо энэ бүх үнэнээ нуучихна гэж боддог С.Ганбаатар ч ширэн нүүртэй юм, Монголын ард түмэн маань ч мартамхай юм, эргээд л түүнийг УИХ-д оруулаад ирсэн.

Харин ширэн нүүртэй, шороо Ганбаа шиг хүмүүс ямар их хортой болохыг саяхан шил дараалан болсон эмгэнэлт явдлууд харуулж байна. Түүн шиг хүмүүст эрх мэдэл өгч болдоггүй юм байна, хүний зовлонгоор зоолдог попролтыг нь зурагт радиогоор нэвтрүүлээд байх хэрэггүй юм байна гэдгийг өөрийгөө шатаасан хоёр залуухан зүрх бидэнд сануулсаар одлоо. Нэгдүгээр сарын 25-наас төв талбай дээр майхан барьж өлсгөлөн зарласан С.Ганбаатар өөрийгөө шатаах эсэхээ эхнэрээсээ асууж байгаад шийднэ хэмээн цэнхэр дэлгэцээр зарласан. Аливаа асуудлыг өөрийгөө шатаагаад шийдчихэж болдог юм байна гэдэг мессэжийг энэ үгээрээ олон нийтэд хүргэжээ гэдэг нь ердөө арваадхан хоногийн дараа яг түүний майхнаа бариад өөрийгөө шатаах тухай яриад зогсож байсан тэр цэгт болж 30 гаруйхан настай залуу амиа алдсан. Энэ эмгэнэлт явдлаас бас л арваадхан хоногийн дараа, С.Ганбаатарыг тэр бэлгэгүй үгийг түмэнд түгээснээс хориодхон хоногийн дараа Ховд аймагт хорь ч хүрээгүй залуу мөн л өөрийгөө шатаагаад, амиа егүүтгэчихлээ.

С.Ганбаатарыг өөрийгөө шатаах тухай орон даяар зарласнаас хойш ердөө хориодхон хоногт хоёр ч залуу зүрх ийн ууршин, уугин одов. Ийм зүйлийг сэдэлжүүлж, попордог С.Ганбаатар ер нь Монголын төлөө юу хийсэн юм бэ?

Аль 2004 оноос л “Эрс шинэчлэлийн хөдөлгөөн” гэж жагсаж гарч ирсэн тэрбээр энэ олон жилд Монголын улс төрийн бас нэгэн өнгө будаг нь явсаар ирсэн. 2012-2016 онд УИХ-ын гишүүн явсан тэрээр 2016 оны сонгуулийн өмнө Хан-Уул дүүрэгт нэр дэвшинэ хэмээн хэсэг шороо манаргасан. Гэсэн ч яг сонгууль болоход Дархан-Уул рүү “нүүсэн”. Түүний энэ гэнэтийн шийдвэрийн талаар хүмүүс тухайн үед Хан-Уул дүүрэгт нэр дэвшсэн Л.Болдоос их мөнгө аваад тойргоо сольсон гэж ярьдаг. Дарханд уначихаад дараахан нь МАХН-аас Ерөнхийлөгчийн сонгуульд нэр дэвшин гаднын шашны байгууллагынхнаас 50 сая вон хууль бусаар авч шороо манаргасан. Ийм аргаар амьдардаг, улс төр хийдэг, мөн сонгууль болгоноор шороо манаргадаг “Шороо” Ганбаа мэтийн хутган үймүүлэгчид үнэн хэрэгтээ Монголын төлөө ганц тоосго ч цохиж үзээгүй.

Зөвхөн шороо манаргаж л явдаг. Бөөн шороо манаргаж явдаг энэ нөхөр эхэн үедээ өмнөдийн мухар сүсгийн шинжтэй баахан мунхруулгын бизнес хийсэн хүн. Фенг-шү хэмээх С.Ганбаатар Монголд үнэндээ юу хийсэн бэ гэх асуултад хэн ч тоймтой юм хэлж чаддаггүй. Учир нь тэрбээр улс орны төлөө юу ч хийгээгүй хүн.

 С.Сүлд