Наркологийн эмнэлгийн дарга Х.Хуланг тус эмнэлгийг өөрийн хувийн болгож ашигласан хэмээн ажлаас нь чөлөөлөөд байсан. Тиймээс тэрээр Нийслэлийн эрүүл мэндийн газарт холбогдох ажилд эргүүлэн томилохыг хүссэн нэхэмжлэлийг Чингэлтэй дүүргийн шүүхэд хүргүүлээд байсан. Уг гомдлыг өнгөрсөн долдугаар сарын 19-нд хэлэлцэж, Хөдөлмөрийн тухай хуулийн 128 дугаар зүйлийн 128.1.2-т заасныг баримтлан Х.Хуланг Наркологийн эмнэлгийн ерөнхий эмчийн ажилд эргүүлэн томилохоор шийдвэрлэсэн. Гэвч шүүхийн шийдвэрийг Нийслэлийн эрүүл мэндийн газар зөвшөөрөхгүй давж заалдах шатны шүүхэд гомдол гаргасан юм.
Уг гомдлыг өнөөдөр Нийслэлийн шүүхийн давж заалдах шатны шүүх хуралдаанаар хянан хэлэлцээд анхан шатны шүүхийн шийдвэрийг хууль ёсны бөгөөд үндэслэл бүхий болж чадаагүй хэмээн үзжээ. Тиймээс анхан шатны шүүхийн шийдвэрийг хүчингүй болгож, нэхэмжлэгчийн нэхэмжлэлийг хэрэгсэхгүй болгосон байна. Ингэснээр Х.Хулан ажилдаа эргүүлэн томилогдохгүй болж байгаа билээ.
Түүнийг эмнэлгийн анхан шатны мэдлэггүй өөрийн төрсөн дүүг сувилагчаар ажиллуулсан, архинаас гарах гэсэн хүмүүсийг биш аав, ээж хамаатан саднаа тусгай өрөөнд хэвтүүлсэн, “Алкабус” нэртэй хордлого тайлах эмийг хоёр дахин үнэлж зарсан хэмээн буруутгасан юм.
Б.Чимэг
